Xosé Manuel del Caño :"Esta antoloxía busca tender pontes entre diferentes estilos e sensibilidades literarias"

Como xorde esta iniciativa? Este é un proxecto aberto e integrador que busca tender pontes entre diferentes estilos e sensibilidades. A iniciativa parte dunha fascinación por grandes autores da literatura galega e polos que están no camiño, cheos de forza e compromiso. Responde a unha mirada interxeracional que amosa a produción literaria que existe na narrativa galega actual. O obxectivo último é construír país, especialmente no eido das letras e das artes. Hai que construílo en todos os eidos, evidentemente, mais este é o que nos toca. Este proxecto tamén bebe dun vello soño: o mundo literario de Celanova, con autores como Manuel Curros Enríquez, Celso Emilio Ferreiro, Xosé Luís Méndez Ferrín, Paulino Vázquez, Oriana Méndez, Baldo Ramos... O proxecto segue a mesma filosofía. Estamos publicando unha antoloxía cada dous anos e pretendemos continuar. Precisamente, este mes dá comezo o novo proxecto literario, o cuarto xa, no que terán moito peso os autores da Galiza interior. Cales son os retos de coordinar unha antoloxía destas características? Neste momento xa contamos con 100 autores que participaron nestes libros. Parto da experiencia que tiven na Fundación Curros Enríquez, da que fun secretario durante mooitos anos, así como no Faro de Vigo, como xornalista relacionado coa cultura e a literatura, mais o primeiro paso sempre é a escoita. Vou falando con cada un dos autores convidados ao proxecto, varias veces ao longo dos dous anos entre publicacións, estabelecendo así unha relación continuada. Ao final isto é algo que me gusta, que fago desde o pracer e o desfrute. Agora que xa estou xubilado podo dedicarme a isto que tanto me gusta! Se ben aínda non está pensado, no futuro non descartamos centrar o xénero escollido para a antoloxía, puidendo propor aos autores escribir relatos de literatura erótica, ciencia ficción ou misterio. Ou quizais dar o salto á poesía ou ao ensaio. Ademais de ser interxeracional, tamén hai unha mestura de traxectorias... Como dicía, o proxecto xorde a raíz da fascinación por grandes autores da nosa literatura, mais tamén somos conscientes de que hai autores moi novos que xa se ve que teñen unha potencialidade e un talento impresionante. Neste sentido, creo que tamén hai que salientar a evolución da literatura feita por mulleres. Décadas atrás, a súa presencia era máis pequena, mais hoxe en día contamos cunha gran cantidade de autoras de grandísimo nivel. Vivimos unha época de esplendor. De feito, no acto de presentación deste libro, xa xurdiron dúas ou tres propostas de autores que poderían participar nos próximos volumes! Creo que as novidades que aportan estas antoloxías son precisamente a diversidade de xeracións e tamén de xéneros. É unha boa mostra da saúde e de como respira a literatura galega actual no eido do relato. Ademais, todos os libros levan unha lámina artística, na portada ou na contraportada, e que despois asinan para os escritores. A primeira foi de Acisclo Manzano e a segunda de Manuel Buciños. Neste caso, foi a escultora Soledad Penalta quen a diseñou e quen nos sorprendeu a todos con esa obra de arte. E xa temos decidido quen se encargará da cuarta: Julia Ares.