O Play-Doc de Tui constata un notábel auxe das mulleres documentalistas

O festival internacional de cinema documental Play-Doc principia a súa XIX edición esta cuarta feira na capital da comarca do Baixo Miño, cun programa que inclúe, máis unha vez, obras de prestixiosos e prestixiosas cineastas, así como traballos de realizadores e realizadoras emerxentes. Moitas das obras que forman parte da programación deste Play-Doc preséntanse como inéditas na Galiza, e tres delas serán proxectadas en Tui como estreas mundiais. Trátase dunha edición que continúa "fiel" ao selo de identidade deste certame que, no decorrer da súa traxectoria, destacou por presentar en España primeiras retrospectivas de cineastas de culto e "verdadeiras" lendas do cinema. Tamén, de maneira especial, o Play-Doc ten sobresaído por recuperar, redescubrir e reivindicar nomes esquecidos, censurados ou amplamente descoñecidos. A XIX edición ofrece, desde esta cuarta feira até a vindeira segunda feira, 1 de maio, unha programación que repasa o cine internacional contemporáneo máis recente, sen perder contacto co máis representativo do cinema producido na Galiza durante o último ano. Así o confirma a Nós Diario Ángel Sánchez, codirector do festival. "Como vocación de festival un dos compromisos que temos co cinema é recuperar voces que, para nós, son esenciais. E efectivamente un dos sinais de identidade do festival é tratar de perseguir nomes esquecidos do cinema para tratar de poñelos de novo en primeiro plano", afirma. Sara García: "No Play-Doc imos recuperar e mostrar verdadeiras lendas do cinema documental" Estreas mundiais Até 13 títulos conforman o programa de cine galego desta nova edición do Play-Doc, entre os que se poderán visualizar tres estreas mundiais. Circo Nevada, de Manuel Valcárcel, Ao outro lado do mar, de Eloy Domínguez Serén e Samuel Moreno Álvarez, e Devocións, de Ángel Montero e María Serna, serán proxectadas de maneira inédita esta fin de semana na vila de Tui. Acoller estreas estatais e mesmo mundiais é "fundamental" para o decorrer dun ciclo de cinema. "No ámbito dos festivais é importante que te elixan para ofrecer ese primeiro pase que é tan importante para moitos cineastas", explica o co-director do Play-Doc. "Desta maneira, moitas das películas da sección internacional do festival veranse por primeira vez no Estado español", engade. Ademais, o codirector do festival confirma a Nós Diario un "notábel auxe" de documentalistas mulleres, cineastas que, con variadas propostas e diversos puntos de vista, tratan temas sobre os que se senten interpeladas. "Algo característico da edición deste ano é a forte presenza de cinema feminino, feito por mulleres e falando de mulleres tamén, e ademais mulleres que falan de si mesmas, de diferentes roles e modelos", explica Ángel Sánchez a Nós Diario. Así, destacan nesta edición Marta Valverde con 30' 70 60' 120, que versa sobre a precariedade laboral á que se enfrontan as persoas mozas. Tamén Paula Iglesias e Marta Gómez coa súa película Hondarrak (En ruínas), explorando o rol das mulleres como eternas coidadoras. Ariadna Gil retrata unha muller do rural en Espantos e desencantos, e Anxos Fazáns reflexiona en Habitar sobre a construción das identidades a través do retrato íntimo de persoas transxénero. Mentres que Laura e Coral Piñeiro denuncian, en Na pel da memoria, o sufrimento de moitas mulleres durante a ditadura de Francisco Franco. A XIX edición do Play-Doc tamén recolle as propostas máis experimentais do cinema producido na Galiza. Neste senso, destacan Helena Girón e Samuel M. Delgado coa súa película Bloom na que conta a historia de San Borondón, unha illa mítica que aparece e desaparece no arquipélago canario. Tamén Iria Sanjurjo con Serpari, que nos expón a un dos rituais máis peculiares da zona de L'Aquila, na rexión italiana de Abruzos, dedicados ás serpes e ao abade San Domenico. Finalmente, en Ecotone, Enar de Dios fai unha crítica, en forma de ensaio audiovisual, ás formas contemporáneas do capitalismo. Completan a competición galega A Foreing Song, de César Souto, que chega a Tui após gañar o premio á mellor película do Estado español e á mellor dirección na pasada edición do Festival de Cine de Xixón (FICX), e Os Saldos, dirixida por Raúl Capdevila, que mostra a evolución industrial e o deterioro da vida nas zonas máis rurais do Estado. O Ciclo Mestre Mateo leva o cine galego recente a oito localidades Competición internacional Na sección competitiva internacional desta XIX edición do festival documental tudense contenderán obras de cineastas de prestixio e traballos de artistas emerxentes. Entre eles, o recoñecido cineasta John Gianvito presentará en Tui o seu último traballo, The Grave's Sky. O festival tamén acollerá obra do prestixioso realizador francés Jean-Claude Rousseau: Welcome e Souvenir D'Athènes. O director italiano Fabrizio Ferraro presentara I morti rimangono con la bocca aperta. Desde Chile participará o director Diego Acosta con Al amparo del cielo, e desde o Xapón, Tetsuichiro Tsuta con Ame no Uta. A colaboración do Play-Doc con filmotecas e cinematecas de Europa e do mundo permite que Tui poida acoller nesta edición a proxección de títulos que Sánchez considera "absolutamente referenciais". É o caso, por exemplo, de Belarmino, de Fernando Lopes, e Máscaras, de Noémia Delgado. "Son películas esenciais para entender a historia do cine luso", valora Sánchez. Cine "arriscado", realizado por mulleres, no Festival de Cans Retrato audiovisual do Baixo Miño Non obstante, o festival de cine tudense non só pon a mirada no cinema profesional galego e estranxeiro. Entre outros aspectos da súa programación (que inclúe música, realidade virtual interactiva, seminarios de crítica, mesas online...), a XIX edición do Play-Doc tamén volverá pór en marcha un taller de cinema, orientado a todas as persoas de Tui e do Baixo Miño co obxectivo de "compartir unha experiencia social e comunitaria mediante o retrato audiovisual da comarca a través da súa veciñanza", explica Ángel Sánchez. As persoas participantes poderán realizar neste obradoiro de cinema unha pequena peza audiovisual cuxo resultado se poderá ver no festival. Precisamente, o taller será impartido polo recoñecido cineasta galego Eloy Domínguez Serén. "O resultado é unha experiencia marabillosa", afirma a Nós Diario o co-director deste festival. Oliver Laxe, Lois Patiño, Diana Toucedo e Lucía Estévez estrearán no Play-Doc