Literatura e arte urbana

Onte estaba por comezar a primeira edición do festival Vimianzo Mola, un festival que procura encher de cor, palabra e creación artística a vila de Vimianzo, na comarca da Terra de Soneira. Porén, as previsións por mal tempo obrigaron a adiar o Mural Fest, un proxecto artístico que inclúe a realización de varios murais de até 180 metros cadrados, e retomaranse nos días 3 e 4 de setembro. As obras farán honra a autores relevantes para Vimianzo ou para a Galiza, entre eles Castelao, no 75º aniversario do seu falecemento, Manuel Rivas ou Evaristo Martelo. Mañá actuará o grupo Tiam Gz cunha demostración de turntablism, unha técnica de DJ con vinilos. O sábado 30 será o Urban Fest, que fará do centro de Vimianzo un espazo con obradoiros de tatuaxes, skate, rap, breakdance, parkour e bag painting, con grande atención á literatura galega. A partir da cuarta feira 3 de setembro o festival retomarase coa elaboración dos 'macro murais', e ao día seguinte haberá unha actuación de Paco Nogueiras para todos os públicos. Na primeira fin de semana de setembro, o Castelo de Vimianza acollerá unha feira de libros e encontros con autoras e autores, entre eles Manuel Rivas, Pedro Feijoo, Ledicia Costas, Pablo Rial ou Amets Arzallus. O sábado 6 haberá un club de lectura infantil arredor de A señorita Bubble, de Ledicia Costas, e actuacións de Vero Rilo, Tania Caamaño, Avelino González, Ghazafellos e o Mago Teto. O festival rematará cunha xornada histórico-teatral, a charla 'Escribir na Costa da Morte', de Manuel Rivas, e o descubrimento dunha placa conmemorativa nun dos murais realizados nesta primeira edición do Vimianzo Mola. Festival Vimianzo Mola / Do 27 de agosto ao 7 de setembro / Na vila e no castelo de Vimianzo (Terra de Soneira) / De balde.