Iria Collazo: "Quería recordar os meus avós tal e como eran, e o humor era unha parte inseparábel"

Iria Collazo López (Barro, comarca de Pontevedra, 1981) asina Os mortos que amei (Galaxia), unha obra na que dá forma á historia dos seus avós, mesturando realidade e ficción a través dunha road trip emotiva e evocadora. A novela constrúese a partir de “estampas da vida e da morte, co humor e a tenrura como protagonistas, que contan con nostalxia unha historia de amor imposíbel”, nun exercicio de memoria que transcende o íntimo para converterse nun relato universal sobre o paso do tempo e os vínculos familiares.