Ideas galegas sobre construción sustentábel na Bienal de Venecia de Arquitectura

O edificio Redeiras, sede institucional da UVigo no barrio vigués do Berbés, será unha das 16 obras que representarán o Estado español na 19ª edición da Bienal de Arquitectura de Venecia, que se celebrará entre o 10 de maio e o 23 de novembro. O Ministerio de Vivenda e Axenda Urbanas seleccionou entre 171 propostas os 16 proxectos que se presentarán na sala central do Pavillón de España en Venecia, no que o edificio Redeiras, deseñado polo estudo compostelán Abalo Alonso Arquitectos, é o único representante da Galiza. O xurado que elixiu os 16 proxectos seleccionados presentes no Pavillón da Bienal de Arquitectura de Venecia estivo formado polo secretario xeral de Axenda Urbana, Vivenda e Arquitectura, Iñaki Carnicero; as arquitectas Anna Bach, Eva Gil e María Langarita e por Manuel Bouzas e Roi Salgueiro, autores da proposta curatorial que gañou o concurso para dirixir o pavillón español da mostra internacional, Internalities: Architectures for Territorial Equilibrium. Na súa acta, este xurado destacou "a alta calidade dos 171 traballos presentados", entre os que se atopa, ademais do edificio Redeiras, a rehabilitación dunha cooperativa agrícola para espazo polivalente e cultura en Flix, o parque de bombeiros de Molà, a praza e o posto de turismo en Piodão ou a restauración da ermida de San Juan de Ruesta no Camiño de Santiago. O edificio O edificio das Redeiras do Berbés nace como produto dunha intervención arquitectónica que transformou tres edificios en ruínas dos que só se conservaba parte das fachadas dianteiras, cos arcos de pedra dos soportais e parte dos balcóns. Abalo Alonso: facendo paisaxe A execución do proxecto, que durou tres anos e medio e contou cun orzamento de 1,6 millóns de euros, destacou polo uso de materiais locais e sustentábeis. Un interior moi flexíbel e a utilización dunha paleta reducida de materiais -a pedra existente, o formigón na cimentación e arranque dos muros en contacto co terreo, madeira no resto da estrutura, tanto vertical, como horizontal, así como carpinterías interiores e exteriores e, por último, o zinc na cuberta-, son dúas das características desta intervención, cuxa estrutura de madeira contralaminada, con paneis foron fabricados no centro de Europa, mecanizados en Navarra e montados en Vigo, o que permitiu reducir tanto o tempo da obra como o seu impacto ambiental. "A Universidade alégrase enormemente deste recoñecemento que vén a reforzar a senda que a Universidade tomou desde as súas orixes na procura dunha arquitectura representativa e de vangarda", destacou o vicerreitor de Planificación e Sostibilidade, José Cidrás, que lembra que este recoñecemento se suma a outros galardóns recibidos por edificacións da UVigo como o Premio Permanencia dos Premios Arquitectura 2024 ao Campus de Vigo, que organiza o Consejo Superior de los Colegios de Arquitectos de España (CSCA), e o premio de Arquitectura e Rehabilitación da Xunta da Galiza ao edificio do Campus da Auga de Ourense. Manuel Gallego Jorreto: "A arquitectura debe salvagardar certos valores éticos, e mesmo espirituais" Un proxecto galego para a Bienal Malia que o de Abalo Alonso é o único edificio galego que estará presente na Bienal de Venecia, a mostra estará comisariada por dous arquitectos e docentes galegos, que actualmente residen nos Estados Unidos: o pontevedrés Manuel Bouzas, profesor no Departamento de Arquitectura da Universidade de Cornell, en Ithaca (Nueva York) e o coruñés Roi Salgueiro, docente na Escola de Arquitectura do Massachusetts Institute of Technology (MIT) en Cambridge, Massachusetts. Bouzas e Salgueiro gañaron coa súa proposta, Internalities: Architectures for Territorial Equilibrium, o concurso para dirixir o pavillón español da mostra internacional. A posibilidade de equilibrar a ecoloxía e a economía na arquitectura, presentando obras que recuperan paletas de materias locais, rexenerativos e de baixa pegada de carbono -como madeira, pedra, cerámica, terra ou fibras vexetais- está no centro deste proxecto, que escolle como exemplo o traballo dunha xeración de arquitectos máis concienciados coa necesidade de redirixir a arquitectura cara a un modelo máis sustentábel. César Portela: "A boa arquitectura non destrúe a natureza, mesmo é quen de dignificala" O proxecto estrutúrase en torno a cinco eixos fundamentais para reducir as emisións do sector da construción: materiais, oficios, enerxía, residuos e emisións. Cada un destes temas explorarase en relación con cinco rexións diferentes da Península Ibérica e será presentado en profundidade nas cinco salas que compoñen o pavillón. A sección dedicada á enerxía centrarase exclusivamente na Galiza, e nela explorarase a relación entre as fontes renovábeis, como o vento e a auga, e as paisaxes onde estas tecnoloxías se implantan. O debate centrarase en como se relacionan estas novas arquitecturas enerxéticas con cuestións clave na Galiza, como a produción de madeira e a xestión forestal. A sala estará coordinada por arquitectos, investigadores e fotógrafos galegos.