O Festival C enche o agosto compostelán de cultura viva e participativa

A sexta edición do Festival C comezou esta segunda e durará até o 28 de agosto. Santiago de Compostela volve vivir unha auténtica festa da cultura na rúa. Organizado polo Concello de Santiago a través de Compostela Cultura, co apoio da Deputación da Coruña e a colaboración de entidades como o programa Apego e o circuíto Danza a Escena do Inaem, o festival ofrece unha programación diversa e gratuíta pensada para todos os públicos. Durante catro semanas, espazos como a Praza da Quintana, o parque de Bonaval, o parque de Galeras, a Alameda, a Casa das Máquinas e a rúa Concepción Arenal acollerán espectáculos de circo, danza, teatro, música, poesía, contos e cinema. Tal como sinala a Nós Diario a concelleira de Capital Cultural, Míriam Louzao: “Queremos que a cultura transcenda os espazos turísticos e habite lugares singulares da cidade tamén durante o verán”. A idea é que quen pasea ou visita Compostela se atope de súpeto cunha intervención artística. O Festival C estrutúrase tematicamente, cunha programación regular cada semana: as segundas feiras serán para a danza, as terzas para os contos, as cuartas para a música e a poesía, e as quintas para o circo. Dúas sesións especiais de cinema ao aire libre completan a proposta. Entre os nomes destacados da programación están Alberto Velasco co seu espectáculo Mover Montañas, que inaugurou esta segunda o festival nunha calorosa tarde no cemiterio de Bonaval. A danza contará coa participación de colectivos como Glovo –co espectáculo Trïade o día 11–, Dexeito –con 70.000 no día 18– e a compañía de Fran Sieira –con Un baile ceibe en comunidade o día 25–, que achegarán propostas contemporáneas a Bonaval e á Casa das Máquinas. A parte poética virá da man das Cantareiras de Ultreia (día 6), Brincadeira (o 13) e Cantigas e Agarimos (o 20), que participarán no ciclo “Por que non cantades todas?” cada cuarta feira ao solpor no Paseo da Ferradura da Alameda. As cuartas feiras, a Praza da Quintana será o espazo para o teatro e o circo, con compañías como Trapu Zaharra (Dale Ramón!, día 7), Duo Laos (Ovella Negra, día 14), Orain Bi (Mute, día 21) e Yllana con Olympics, que porá fin ao festival o día 28. Cinema baixo as estrelas O cinema tamén terá o seu espazo, concretamente na rúa Concepción Arenal, da man da cooperativa Numax. A terza feira 26 proxectarase Daguerrotipos, o documental de Agnès Varda sobre a rúa Daguerre –onde vivía a cineasta en París–, e a cuarta feira 28 será a quenda de Do the Right Thing, de Spike Lee, un potente e divertido retrato das tensións raciais nun barrio de Brooklyn durante un día abafante de verán. Ambos os filmes poderán verse en versión orixinal subtitulada e están pensados para público adulto. Un festival cun futuro consolidado A deputada de Cultura da Deputación da Coruña, Natividade González, destaca a Nós Dirario que a Deputación “avala esta programación e quere continuar con este programa que foi un éxito en anteriores edicións”. O incremento do apoio económico da Deputación da Coruña, que pasa dos 200.000 aos 300.000 euros nesta edición, confirma o respaldo institucional ao festival. González subliña tamén a implicación do Auditorio da Galiza no deseño do programa e a colaboración activa co Concello de Santiago. “Falamos dunha aposta conxunta polas artes escénicas, o circo e o teatro de calidade, accesíbeis e na rúa”. Un dos sinais de identidade do Festival C é a súa vocación inclusiva e participativa. Todas as actividades son gratuítas e de acceso libre, agás os obradoiros de circo infantís, que, aínda que tamén sen custo, requiren inscrición previa para garantir o aforo axeitado. A concelleira de Capital Cultural, Míriam Louzao, insiste na idea de facer da cidade un escenario vivo tamén no mes de agosto, tradicionalmente máis baleiro de programación. “Queremos que a cultura siga enchendo os espazos durante todo o ano. Que Compostela sexa unha cidade onde a creación cultural propia se mostre en pé de igualdade con propostas que veñen de fóra”. Compostela, cidade creativa O Festival C é moito máis que unha programación de verán. É unha aposta pola cultura como motor de encontro, de ocupación do espazo público e de creación de comunidade. Unha oportunidade para descubrir artistas, habitar prazas e parques con novos ollos e deixar que a sorpresa artística se mesture coa vida cotiá. Desde as risas provocadas polo teatro cómico ás acrobacias do circo, pasando polas coreografías máis innovadoras, a poesía ao solpor ou o cinema de autor, esta edición do Festival C promete facer de Compostela un escenario aberto á diversidade creativa. Un verán de cultura viva para todas e todos. Ao longo destas catro semanas, a programación ofrece unha cadencia temática que convida a seguir o festival como un ciclo continuado de descubertas culturais.