Fátima Suárez e Álvaro López: "Galego para peques' nace dos vídeos que lle gustan ao noso neno e que non hai en galego"

Como comezaron o seu proxecto? Principalmente a través do noso neno. Viamos os vídeos que lle gustaban, noutras linguas, e pareceunos que non era tan difícil facelos en galego, mais por moito que rebuscabamos non atopabamos nada. Por exemplo, un dos primeiros que subimos é un vídeo sen dereitos nos que van aparecendo diferentes animais e os seus nomes cunha voz en off. O problema é que nós non fixemos nada relacionado co audiovisual nin temos moitos coñecementos, polo que realmente sentímolo máis como unha protesta que como un proxecto serio. Podería facerse mellor, mais é a nosa maneira de demostrar que hai demanda. Facémolo con moito cariño e moito traballo, iso si. Como organizan a creación de vídeos? A maior parte da inspiración vén do que vemos que lle gusta ao noso neno. Se hai algún vídeo que lle gusta especialmente ou algunha temática que están traballando na escola, intentamos facelo á nosa maneira. Por exemplo, cando fixo os catro anos quixo facer unha festa temática dos tres porquiños, polo que decidimos facer tamén un vídeo con ese conto. Outras ideas tamén nos veñen por ver o que triunfa noutras linguas, como vídeos do abecedario, que son algúns dos que estamos facendo agora. Ademais, Fátima é logopeda, polo que se lle ocorreu a idea de utilizar pictogramas nalgúns vídeos. Polo momento fixémolo en vídeos de cancións, mais tamén queremos incorporalos a outros que fagamos con contos. Ela, no seu traballo, ten que traducirlles en automático ás crianzas que falan galego, porque non hai materiais. Con respecto ao calendario, non nos marcamos ningún prazo. Hai meses que conseguimos sacar tres vídeos e outros que non somos quen de publicar ningún, pero non podemos facer máis. A sorte que temos é que o noso neno dorme bastante ben e é capaz de durmir só, polo que nos permite ter unha ou dúas horas de ocio cada día. Tampouco temos traballos con horarios moi esixentes, polo que algúns días usamos estas horas para este proxecto. E así é como imos avanzando, pouco a pouco. Precisamente, o uso dos pictogramas é rechamante, posto que non é un recurso moi habitual. Claro. Se non fose por Fátima eu tampouco sabería nada, por sorte. Porque ao final creo que é algo do que non te das de conta a non ser que o teu fillo o precise. E como isto, outras cousas, quizais en lingua de signos ou con materiais. Como digo, é un proxecto que podería dar moito máis de si, se estivese feito por xente profesional, tanto do audiovisual como da educación. Nós centrámonos en infantil, mais seguro que tamén poderían facerse vídeos similares para outras etapas. Incorporáronse as pantallas ás aulas, mais que material é o que se visualiza nesas pantallas? Como ven o futuro do proxecto? Polo momento a nosa intención é seguir facendo vídeos coas seguintes letras do abecedario, así como continuar subindo contos e cancións. O outro día tamén estiven barallando como podíamos facer un vídeo sobre as diferentes partes do corpo humano. Nun futuro, gustaríanos coller os materiais que facemos para os nosos vídeos e convertelos en libros para colorear, algo que tamén nos parece necesario. É certo que colorear non ten idioma, mais moitos destes libros asocian os debuxos a vocabulario, e, cando menos polo que vemos, non hai exemplos disto en galego.