O último do ano

Guacamole de lagostinos con chips de batata Unha versión especial deste famoso mollo. Os lagostinos combinan á perfección co guacamole e os chips de batata son estupendos para mollar nel, ademais de encher de cor o prato grazas ao seu rechamente laranxa. Ingredientes. Para o guacamole:3 aguacates maduros, 1/2 tomate madurom 10 lagostinos cocidos, 1/2 ceboliña, limón, comiño en pó, sal, aceite e pementa, negra moída. Para os chips: 2 batatas, pemento picante moído, sal, aceite e pementa. Elaboración: Comezamos preparando os chips. Lavamos ben a pataca doce e cunha mandolina cortámola en toros de medio centímetro. Botámolos nun cunco e botámoslles aceite e unha culleriña de pemento picante moído, remexemos ben para que se impregnen todos os anacos. Nunha bandexa colocamos un papel de forno e sobre el imos poñendo os anacos de batata sen que se pisen uns con outros. Botámoslles sal e pementa e metémolos no forno, que previamente quentamos a 200 graos, uns 10 minutos. Pasado este tempo dámoslle a volta aos anacos de pataca doce e deixamos outros 10 minutos, coidando que non se queimen. Teñen que quedar duros e crocantes. Mentres se cociña a batata facemos o guacamole. Cortamos os aguacates pola metade e tirámoslles o oso, sacamos a carne e botámola nun cunco. Pisámolos ben cun garfo e engadímoslle o tomate e a ceboliña picada en cadradiños, un chorriño de zume de limón, sal, un chisco de comiño en pó e mesturamos ben. Pelamos os lagostinos, cortámolos en 3 ou 4 anacos e mesturámolos co guacamole. Servimos o guacamole nun cunco rodeado dos chips de batata. Rodaballo ao forno. Rodaballo ao forno O rodaballo é un peixe exquisito, cunha sinxela preparación no forno obtemos un sabor impresionante, que deixará abraiados aos vosos convidados. Ingredientes (4 persoas): 5 patacas, 1 cebola, 1 rodaballo enteiro. 2 allos, aceite de oliva, sal e pementa, pirixel fresco, 1/2 vaso de viño branco. Elaboración: En primeiro lugar facemos cortes transversais ao rodaballo, de xeito que queden anacos duns dous dedos de ancho máis ou menos. Podemos pedir que o preparen deste xeito na peixaria. A seguir, salpementamos o rodaballo botándolle ben o sal e a pementa nos cortes que acabamos de facer. Cortamos as patacas en rodas moi finas e colocámolas nunha bandexa apta para o forno con sal e aceite. Metémolas no forno, que previamente quentamos a 180º, e deixámolas uns 25 minutos. Pasado este tempo cortamos en rodas finas tamén a cebola e colocámolas sobre as patacas, regamos cun chorriño de aceite e deixamos outros 5 minutos. Cando teñamos as patacas case cociñadas, colocamos sobre elas o rodaballo. Para rematar de adobar o peixe imos preparar unha allada. Para isto picamos moi finiños os allos, picamos tamen o pirixel e mesturámolos nun cunco xunto co viño e dúas culleres de aceite. Untamos ben o rodaballo coa allada e metémolo no forno tapado por enriba con papel de aluminio durante 20 minutos, máis ou menos. Finalmente, retiramos o papel de aluminio e deixamos outros 10 minutos no forno para que se doure por enriba. Bolachas de xenxibre. Bolachas de xenxibre As bolachas de xenxibre son un doce típico da época do Nadal. A mestura de especias dalles un toque delicioso e a súa forma de bonequiños fainas perfectas para cociñar cos máis cativos. Ingredientes (4 persoas): 450 g de fariña de trigo, 200 g de manteiga a temperatura ambiente, 100 g de azucre moreno, 2 culleriñas de canela moída, 1 culleriña de xenxibre moído, 1 ovo, 40 g de mel. Elaboración: Mesturamos ben a fariña peneirada, o xenxibre e a canela e reservamos. A manteiga é moi importante que estea a temperatura ambiente para que se mesture ben, se non nos deu tempo a sacala antes da neveira podemos darlle un golpe de calor no microondas, pero sen que chegue a derreterse. Cortamos a manteiga en anacos e batémola cun batedor de globo eléctrico. A continuación engadimos o azucre e seguimos batendo uns 5 minutos até que ambos se integren completamente. Engadimos o ovo e o mel e seguimos batendo outro pouco. Logo incorporamos a mestura de fariña coas especias e amasamos até ter unha masa homoxénea. Se vemos que despois de amasala se pega demasiado ás mans engadímoslle un chisco máis de fariña. Facemos unha bola coa masa, envolvémola en film transparente e deixámola na neveira unha hora para que se endureza. Finalmente, cun rolete estendemos a masa e facemos as bolachas coa forma que maís nos guste. Colocámolas sobre papel vexetal e metémolas no forno, que previamente quentamos a 180º, durante uns 10 ou 15 minutos, até que comecen a dourarse polos bordos. Retirámolas do forno e deixamos que arrefríen sobre unha rexa antes de desfrutalas.