Non todo é o que parece, amigo

Frittata de espárragos verdes, cabaciña, tomates cereixa e queixo de cabra A Frittata é un prato moi común na gastronomía italiana. Pode parecer unha tortilla de pataca pero é un chisco diferente, está a medio camiño entre este prato e unha quiche. Ingredientes (2 persoas): 1 presa de espárragos verdes, 1 cabaciña, 6 ovos, 100 ml de leite, 50 g de queixo de cabra (rulo), 8 tomatiños cherry, pementa negra moída, 3 allos, sal, aceite de oliva Elaboración: Imos empregar unha tixola de aceiro para poder metela directamente ao forno, se non temos podemos refogar as verduriñas nunha tixola e logo pasalo a un molde ou bandexa que se poda meter no forno. Comezamos lavando os espárragos e cortámolos en anacos máis pequenos. Lavamos a cabaciña tamén e cortámola en toros non moi grosos e reservamos. Lavamos os tomatiños cherry e cortámolos pola metade. Cortamos tamén en toros o rulo de queixo de cabra e reservámolos. A continuación, nunha tixola cun chisco de aceite douramos un pouco os allos cortados en anacos e engadimos os espárragos e a cabaciña. Salteámolos cun chisco de sal uns 5 ou 10 minutos até que estean cociñados. Nun cunco á parte batemos ben os 6 ovos. Engadimos o leite e un chisco de pementa moída e batemos todo. Botamos a mestura de ovo e leite na tixola coas verduriñas e colocamos por enriba os tomatiños cherry coa parte cortada cara arriba e os anacos de queixo de cabra. Metemos no forno, que previamente quentamos a 200º, durante uns 10 ou 15 minutos, segundo nos guste máis ou menos cociñado o ovo. Retiramos a tixola do forno con coidado de non queimarnos e xa podemos desfrutala. Espaguetes de cabaciña á 'puttanesca'. Espaguetes de cabaciña á puttanesca Aproveitando que as cabaciñas están de temporada imos facer uns falsos espaguetes con esta verdura. Un prato ben orixinal, saboroso e san. Ingredientes (2 persoas): 1 cabaciña, 4 allos, 1 lata de anchoas, 200 g de tomates cereixa, alcaparras, olivas kalamata Elaboración: Comezamos lavando a cabaciña e facendo os espaguetes cun relador de verduras. Se non temos este relador especial podemos cortar a cabaciña en láminas e logo en tiras para facelos nós mesmos. Pelamos dous allos e cortámolos en anaquiños. Nunha tixola cun chisco de aceite douramos a fogo suave os allos e logo engadimos os espaguetes de cabaciña, salteamos uns minutos e retirámolos do lume cando estean cociñados pero aínda algo duriños. Reservamos os espaguetes. Pelamos dous allos e esmagámolos coa man. Na mesma tixola douramos os allos e logo engadimos as anchoas cortadas en anacos, e remexemos cunha culler até que se desfagan e se forme unha pasta. Engadimos os tomates cereixa lavados e cortados pola metade e seguimos refogando até que comecen a soltar o mollo. Neste punto botamos as alcaparras e as olivas e seguimos remexendo até que se cociñen ben os tomates, pero sen que rematen de desfacerse de todo para que fiquen máis vistosos. Servimos os espaguetes nun prato e por enriba o mollo de tomates e anchoas. Torta rápida de ananás Torta rápida de ananás Con esta receita rápida de torta de ananás podemos facer unha sobremesa sen moito traballo e cun resultado exquisito. Non imos nin precisar facer a base de biscoito, o máis difícil será agardar a que arrefríe para poder desfrutala. Ingredientes (2 persoas): 370 g de leite condensado, 1 lata de ananás en almibre (820g), 2 sobres de xelatina de ananás, sobaos, caramelo líquido, 400 ml de nata para bater Molde: Bandexa de 30x21 cms. Elaboración: A elaboración desta torta é moi sinxela. En primeiro lugar abrimos a lata de ananás e botamos o almibre nun cazo. Poñémolo a lume medio e cando estea quente, pero sen chegar a ferver, botamos a xelatina e remexemos ben até que se disolva. Neste punto engadimos a nata para bater e integramos todo para obter unha mestura homoxénea. Mentres a crema arrefría un chisco comezamos a montar o resto da torta. Primeiro botamos na base dunha bandexa fonda caramelo líquido e por enriba desa capa de caramelo poñemos os toros de ananás. Logo colocamos os sobaos sobre a piña, coa parte dourada cara abaixo e picámolos ben cun garfo para que máis tarde absorban ben todo o zume. Botamos a mestura do almibre coa nata e a xelatina sobre eles e deixamos arrefriar na neveira unhas 4 horas para que se solidifique a crema. Para servila, imos pasar un coitelo con moito coidado polos bordos da torta para despegala e, finalmente, dámoslle a volta sobre a bandexa na que a imos servir.