A pezoña da guerra

Unha gran muller inspírase libremente na novela colectiva A guerra non ten rostro de muller da Premio Nobel de Literatura Svetlana Alexievich. Sitúa a acción en 1945, en Leningrado. Nun contexto de miseria e morte tras a Segunda Guerra Mundial, dúas ex combatentes do Exército Vermello, a enfermeira Ilya, que sofre dunha conmoción cerebral, e a condecorada heroína Masha, obsesionada con ter un fillo, tratarán de sobrevivir á nova realidade, superar os traumas da guerra e recuperar as súas vidas. Unha gran muller | Dylda | Beanpole, 2019 | Kantemir Balagov | 130 minutos Antes de levar a engano, a historia non vai dunha "gran muller" en sentido figurado... senón literal. Ilya é un fiúncho, alta e espigada. Unha "muller grande" que podería ser froito de burlas pero que na sociedade soviética apenas é diferenciada por un alcume. Ao pouco de presentala comete unha atrocidade irreversíbel. Unha patada no estómago que define á perfección o baleiro interior da personaxe. Bagalov non pretende xustificala pero logra plasmar até que punto afecta a guerra nos corazóns das persoas. Non as fai peores, pero si menos humanas, esta vez si, no sentido figurado da palabra... Sexo, amor, amizade, débedas, remorsos, anhelos frustrados, aceptación social, maternidade e incluso eutanasia en tempos de postguerra (con chiscadela a Johnny colleu seu fusil) están presentes neste drama apolítico, e nada compracente, de dúas mulleres con motivacións sinxelas e moitas taras, pero sen malicia, coas que vai ser practicamente imposíbel empatizar, manténdonos distantes durante toda a metraxe. Unha viaxe pesimista de seres quebrados, desorientados e pouco agraciados que contrasta coa soberbia fotografía de Kseniya Sereda, chea de belísimos planos en perfecto equilibrio entre a obra pictórica de Vermeer, o traballo de Robert Capa e o estilo visual de Jean-Pierre Jeunet (Amelie). Atmosferas de vermellos óxido, ocres e verdes que inundan cada secuencia... O verde adoita ser sinónimo de esperanza pero neste contexto achégase máis ao significado de pezoña.