De Sanxenxo a Cabicastro

O litoral de Sanxenxo é abondo longo e variado como para poder facer por el varias camiñadas de interese diverso, maiormente panorámico, paisaxístico e ambiental. Aínda que a maior parte se asenta na banda norte da ría de Pontevedra, tamén ten unha parte enfrontada ao mar aberto, entre a Punta Faxilda e a praia da Lanzada, e outra, no seo do Umia, na ría de Arousa. Paraxe: Ría de Pontevedra / Concello: Sanxenxo / Percorrido: 13 km (ida e volta) / Dificultade: Baixa Nesta ocasión, propoñemos percorrer un tramo desde a vila cara á boca da ría. Un roteiro panorámico, de contrastes entre zonas abrigadas e tranquilas e zonas de mar aberto, de areais recollidos onde o mar chega manso, e cantís expostos nos que as ondas baten constantemente, praias urbanas e praias que aínda conservan parte da súa natureza, e rochedos verticais nos que chaman a atención as formas das rochas e a súa estrutura; mais tamén con espazos polos que non é posíbel pasar porque o impiden as formas do relevo e os peches das propiedades particulares. Comezamos no porto de Sanxenxo para percorrermos logo o paseo de Silgar e achegarnos á punta Vicaño, que, aínda que está ocupada en parte por propiedades privadas, acolle un parque e un miradoiro sobre a contorna -Sanxenxo, Portonovo e as localidades do Morrazo que se atopan na outra banda da ría- que merece unha visita. Continuamos para baixar á praia de Baltar -que, a pesar da súa situación, aínda conserva parte do seu sistema de dunas- e percorrela mentres nos achegamos a Portonovo, asentado na punta que lle dá abrigo ao porto, o principal centro de actividade pesqueira da zona, e seguir camiño pola rúa da beira do mar até o monumento á peixeira e ir desde el á praia de Caneliñas. Desde Caneliñas non é posíbel seguir pola beira, nin tentalo, porque non hai camiño e un corte no cantil impide o paso, así que temos que seguir un percorrido labiríntico que comeza na rúa da saída do tráfico e coller o primeiro desvío á esquerda e logo o primeiro á dereita e, na saída, de novo á esquerda para seguir logo dereito até o fondo -primeiro por estrada, logo por camiño e por último por un carreiro- para chegarmos á punta Seame que remata nun illote de nome curioso e alegórico, o Papatimóns. Volvemos atrás polo mesmo camiño e, na estrada, desviámonos na primeira á esquerda para baixar á praia de Canelas. Percorremos a praia de Canelas e, na outra punta, subimos a un carreiro que vai por debaixo das casas, sinalizado con frechas azuis, o sendeiro de Canelas a Cabicastro, que preto da beira do cantil nos leva á punta, onde rematamos. A volta podémola facer polo camiño de ida, que sen os desvíos se acurta en 1,5 km, ou acurtala 2,5 km saíndo de Cabicastro á estrada principal e volvendo pola súa beira ao punto de partida.