Litoral e Poio. De Lourido a Combarro

O relevo é moi accidentado, as abas dos montes do Castrove caen bruscamente cara ao mar e por elas escoan numerosos ríos de curto percorrido (regos dos Mouros, Cancela, Covelo e Muíños) que baixan por pendentes pronunciadas nas que forman algunhas fervenzas, e só hai algúns terreos chans na estreita faixa costeira, que neste tramo do percorrido é abrigada, baixa, de augas pouco profundas e con numerosos seos, lameiros e enormes areais nos que o devalar da marea deixa amplas superficies en seco, nas que se desenvolve unha importante actividade marisqueira. Comezamos o percorrido en Lourido, porque o espazo entre a Ponte da Barca e Lourido non ten camiños para seguilo pola beira, aínda que hai algúns puntos nos que é posible aproximarse á canle do río. Achegámonos para comezar á punta das Saíñas, xa nos lameiros do fondo da ría; desde ela vemos ao peirao de Besada, beireamos logo o seo de Lourido para chegarmos á praia; un longo areal que arranca na frecha do seo, continúa coa praia do Polvorín ou de Lourido para virar nun saínte rochoso e rematar na praia da Cabeceira, que se prolonga nunha grande superficie mar adentro e pola enseada de Campelo ata Combarro. Desde a praia da Cabeceira, coa marea baixa, pódese continuar pola area até o porto de Campelo; ou subir á estrada e por unha beirarrúa con varios miradoiros facelo por un espazo preto da beira pero cun punto de vista máis elevado. Desde o porto de Campelo un camiño peonil acondicionado tráenos preto da beira do mar, pasando pola Ostreira, até A Seca, a área deportiva e de lecer de Poio. Antes de entrar na Seca cruzamos un regueiro, o rego das Cancelas, que uns poucos metros augas arriba ten un grupo de muíños e unha fervenza, os Muíños da Freixa, merecentes dunha visita. No final da área da Seca, subimos á estrada porque este tramo, até Combarro, tamén ten o litoral ocupado por propiedades pechadas, pódese seguir por abaixo se a marea acompaña, rodear a punta da Pinela e camiñar pola beira do areal até chegar á praia do Padrón. Baixamos á praia do Padrón porque é o punto desde o que temos as máis fermosas panorámicas da fachada costeira tradicional de Combarro e, pola area, podemos achegarnos a ver de preto os hórreos e as construcións tradicionais; logo non está de máis deixarse ir polas rúas para apreciar os detalles ata que decidamos saír ao porto para rematar a viaxe.