Cadramón-Xistral-Cadramón

Do Cadramón ao Xistral e volta, ou ao revés; porque a calquera dos dous puntos podemos achegarnos cun vehículo. Unha camiñada de ida e volta entre os dous cumes máis representativos do Xistral, ambos os dous por enriba dos 1.000 m de altitude, para gozar das especiais características do medio, e de excelentes panorámicas da serra e da súa contorna, camiñando por unha paisaxe atípica, de formas suaves e horizontes despexados, na que só os carreiros, ás veces invisibles, rompen a cor uniforme, verde máis ou menos viva, segundo a época do ano, ou gris prateada, cando a abana o vento, da herba que o cobre todo. Un percorrido polos lombos que se enchoupan coa auga das choivas e das néboas que veñen desde o Atlántico e/ou desde o Cantábrico e manteñen na zona unha humidade constante que deu lugar á formación de grandes áreas de turbeira, humidade que despois escoa para alimentar as cabeceiras dos numerosos ríos que teñen nos arredores as súas fontes orixinarias (Ouro, Pedrido-Masma, Eume, Landro...). Paraxe: Serra do Xistral / Concellos: O Valadouro e Muras / Dificultade: Media / Percorrido: 10 quilómetros (ida e volta) As especiais características do substrato e o ambiente húmido fan que na contorna poidamos atopar especies con particulares adaptacións, ou únicas. As turbeiras do Xistral, algunhas explotadas comercialmente, acollen o maior número de especies de esfagnos (brións das turbeiras) de toda a Península ibérica e mais de 20 especies de plantas consideradas en perigo de extinción; e contan tamén con animais endémicos como as bolboretas Erebia triaria pargapondalense e Erebia epiphron xistralensis, e outros de especies pouco comúns como o furapresas (Galemys pyrenaica) e o lagartiño das turbeiras (Lacerta vivipara). Pola súa importancia paisaxística e ambiental a serra do Xistral está protexida como LIC/ZEC O Xistral. Para subir ao Xistral, indo de Muras a Viveiro, pola Gañidoira, collemos o desvío a Viveiró e na estrada de Viveiró á Balsa, en Porromeu, a subida ao cume; e para subir ao Cadramón, na estrada de Abadín a Ferreira do Valadouro, o desvío ao parque eólico do Cadramón. Nós iniciamos a ruta no cume do Cadramón para que o sol, ás nosas costas, non interfira nas vistas, baixamos por un "cortalumes" de forte pendente ata o pé do monte, e camiñamos por el, que segue a liña dos cumes, ata chegarmos a un feche de arame, pasamos ao outro lado e, avanzando paralelos a el, coroamos o Seixo Branco, a onde chega o concello de Abadín, e logo baixámolo seguindo o lombo para chegarmos á estrada que sube ao pico do Xistral, que seguiremos no derradeiro tramo. A volta facémola polo mesmo camiño que remata coa subida pola forte pendente que leva ao cume do Cadramón (cun último tramo, que non chega ao quilómetro, no que se soben mais de 150 m).