Augasmestas

Non sempre é necesario facer longos percorridos para gozar de momentos e situacións satisfactorias, ás veces un só punto é suficiente para sacar proveito dunha viaxe, e máis se se para nel varias veces. Un deles é o que indo para o Courel, Valdeorras ou outros lugares da contorna, despois de algo máis de dúas horas de viaxe, temos fixado para unha parada, un lugar onde nós, e as sucesivas Xeas que nos acompañan, aproveitabamos para facer unha pausa, para estirar as pernas e se a temporada e a hora eran as axeitadas, porque o bar non está sempre aberto, unha ocasión para facer un reforzo do almorzo ou para un refrixerio. O lugar é a área turística de Augasmestas, en Quiroga (hoxe abandonada, mais que contou no seu día con servizos: zona de aparcamento, área acondicionada para caravanas, e embarcadoiro para paseos polo Sil). Unha parada tranquila, perto da estrada, recollida, con sitio para aparcar, mobiliario para unha pausa, espazo para un paseo, e fermosas panorámicas, na confluencia dos ríos Lor e Sil, xusto onde este empeza a encaixarse para entrar no canón. Un lugar que por coñecido e moitas veces visitado, non deixa de ter interese e valor porque en cada ocasión atopamos nel ademais das vistas e as paisaxes cambiantes, unha mestura de especies da vexetación mediterránea (aciñeiras, adernos...) con árbores de ribeira (freixos, salgueiros, lamagueiros...), rebolos e árbores cultivadas, que nos permitirán gozar dos cambios aos que as variacións do ambiente someten a natureza ao longo das diferentes estacións, da presenza das floracións na primavera e dos froitos no verán e no outono. Mais Augasmestas tamén pode ser punto de partida para algunhas camiñadas ou para achegarse a interesantes puntos dos arredores como o miradoiro da Pena de Lodeiro, a onde se vai desde Rairos, que ten panorámicas sobre o val do Sil na confluencia co Lor, Augasmestas, e sobre a dobra da Pena Grande, unha primeira mostra da forza da natureza, antes de achegarse ás de Campodola e Leixazós no Parque Xeolóxico do Courel; e, mais adiante, pola mesma estrada, atópase Torbeo outro fermoso punto panorámico desde onde se ve como o Sil, retido no encoro de Santo Estevo, se retorce, obrigado polo relevo, no primeiro tramo do canón. Esta primeira parte do canón tamén se pode percorrer a pé pola beira do río desde Castro de Abaixo até a Covela, uns 7 km máis a volta, ou completala como circular subindo a Torbeo desde onde, ao ir gañando altura, melloran moito as panorámicas, e volver por arriba, pola estrada, para baixar logo a Castro, sen aumentar a lonxitude total do percorrido, uns 14 km.