A Alameda compostelá acolleu este domingo o arranque dunha manifestación convocada pola plataforma Queremos Galego e apoiada por máis de 150 entidades políticas, económicas, sociais e culturais do país. Baixo o lema 'Lingua vital xa!', a cita ten por obxectivo "parar a emerxencia lingüística" que sofre o idioma galego e exixir á Xunta da Galiza "un cambio de actitude".
A manifestación, convocada o Día de Rosalía, saíu ás 12 horas da Alameda de Santiago cara á praza do Obradoiro co obxectivo de defender unha lingua que se poida utilizar en todos os contextos, "un dereito que —consideran os organizadores— agora mesmo a poboación galega non ten no seu poder".