Sagrario Abelleira

O seu descubrimento deita unha nova luz sobre a vida de Rosalía de Castro. Sagrario Abelleira vén de atopar o expediente matrimonial da autora, que confirma que a verdadeira data do seu nacemento é o 23 de febreiro de 1837. Iso cambia a celebración do Día de Rosalía, mais tamén rompe algúns mitos que se repetían de forma acrítica -como que a súa nai, Teresa de Castro, a abandonara- e abre novas vías de investigación sobre a autora.

Na publicación monográfica sobre Rosalía de Castro, que verá a luz este sábado, día 19, contaremos co testemuño de Sagrario Abelleira e cos artigos de Mercedes Espiño, María Pilar García Negro, Manuel Xestoso, Anxo Angueira e Xosé Luís Axeitos.

A investigadora Sagrario Abelleira vén de presentar Rosalía e Murguía: datos, datas e documentos (1851-1858), o libro onde recolle información inédita sobre Rosalía de Castro, como a súa nova data de nacemento.