Exposto a un ultimato após outro, caeu Pepe Mel a mans do Girona no que probabelmente tampouco foi o pior dos xogos dirixidos polo treinador madrileño. Mel fracasou por non ser capaz de achar un mínimo equilibrio no plantel, ora angustiado ora apático. Nunca foi capaz de dar unha mínima coherencia a unha equipa que en teoría esta temporada está chamada a non pasar apuros.
O Dépor é unha equipa que se resiste a ser feliz. Esta segunda feira podía sumar tres pontos face un rival tan directo como asequíbel -da súa liga, para entendérmonos- e afastarse da zona de perigo. Non foi quen. O fatalismo apareceuse en forma dun penalti imaxinario en contra. Restabelecida a igualdade con outra pena máxima fantasmagórica, a zaga branquiazul condenouse a si propia cunha nova mostra da súa vunerabilidade extrema.
O efeito Lucas Pérez terá que esperar. O futebolista de Monelos apareceu sobre o verde no minuto 47 e, case de imediato, o Dépor colocaba o 2-2 no taboleiro de marcas. Bonita reacción para unha equipa que aos 4 minutos ía perdendo 0-2. Mais Lucas non fai milagres, os agasallos continuaron e a Real cazou os tres pontos en xogo.
Final da tortura. Un empate sen goles na casa dunha das equipas máis potentes do campionato valeu para o Dépor selar a permanencia sen agardar a última xornada. Cada día é máis barato safar do descenso. Desta volta abondou con sumar 33 pontos en 37 xogos (0,8 pontos por partido) para ficar na Primeira División. O Dépor mantén a categoría, mais non despexa as dúbidas sobre a solvencia do seu proxecto.
Salvarse sen apuros e antes de tempo? Non grazas, iso sería atentar contra a historia deste clube, abonado a sofrer até o último minuto (mesmo na época do SuperDépor con momentos agónicos como o penalti de Djukic ou a final interruptus de Copa co Valéncia). Dá a impresión de que así pensan os xogadores do Deportivo, que esta quinta feira desbaldiron unha magnífica oportunidade para selar a permanencia.
O Dépor-Atlético contivo dúas historias. Unha, a futbolística, intensa. Outra, unha curtametraxe de apenas cinco minutos tamén intensa, a intensidade da angustia que se viviu no estadio após unha caída estarrecedora de Fernando Torres sobre a herba de Riazor. As dúas tiveron happy end.
Asina polo que fica de temporada e tamén pola próxima, sempre e cando consiga evitar o descenso. Pepe Mel (Madrid, 1963) está certo de que o Dépor ten recursos futbolísticos máis que suficientes para manter a categoría. "Ao Dépor nunca lle podes dicer que non se te chama para treinalo", dixo.
A falta da protocolaria confirmación oficial, Pepe Mel é o novo inquilino do banco branquiazul. Sentará nel xa esta quinta feira en Riazor, face o Atlético de Madrid. É un técnico con experiencia na elite. Sabe de ascender equipas e de evitar descensos.
Esta segunda feira o Dépor volta aos adestramentos con Cristóbal Parralo, o treinador do Fabril, como técnico provisorio. O clube continúa a negociar a incorporación de Pepe Mel.
