O Executivo galego fará hoxe entrega no Parlamento do proxecto de lei de orzamentos para 2023. A proposta articúlase sobre unhas previsións macroeconómicas desmentidas polos principais estudos elaborados por organismos independentes. A partida das contas públicas que máis se incrementa é a destinada ao pago de xuros da débeda pública.
O presidente da Xunta, Alfonso Rueda, compareceu onte no Parlamento tendo claro cal era o seu anuncio principal para a sesión na que ía dar conta das liñas mestras dos orzamentos da Xunta para 2023: a deflactación dos tres primeiros tramos autonómicos do IRPF. Unha medida, dixo, que permitirá a galegos e galegas aforrar 46 millóns de euros no marco do que o mandatario cualifica como "senda fiscal propia". O BNG e o PSdeG cuestionaron as contas botadas polo presidente, advertiron que na proposta fiscal da Xunta quen máis se beneficia son "os ricos" e situaron en Génova [sede do PP estatal] o lugar onde se decide a política da Xunta en impostos.
Un informe do Consello Xeral de Economistas conclúe que a presión fiscal galega é reducida para as rendas altas e elevada para as baixas e medias.
