Unha escolma do papel: Lugo é letras
Xosé Ramón Freixeiro Mato
14/xul./17 13:26
María Pilar Campo Domínguez, a escritora Marica Campo, naceu no Val do Mao (O Incio, Lugo) no ano 1948, cando con moita probabilidade Ánxel Fole preparaba os magníficos relatos do seu libro Á lus do candil localizados nas veciñas terras courelás, acrecentados poucos anos despois, en 1955, coa publicación das engaiolantes historias de Terra Brava, ambientadas xeográfica e lingüisticamente nestas terras do Incio, aínda coa nosa autora a gozar da liberdade da vida infantil polos mesmos espazos rurais narrados por aquel e enxalzados nunha cántiga popular que reproduce o propio Fole na súa obra: Viva o Incio, viva o Incio, / terra de lobos e xestas... Terra brava, en fin, onde Marica Campo vai dar os primeiros pasos na descuberta do mundo e na conformación da súa personalidade.