Agora

Un home faleceu na tarde desta terza feira, 22 de agosto, após ser atropelado por unha furgoneta na Estrada (Terra de Montes). A vítima é un octoxenario veciño desta localidade. Segundo a información do CIAE 112-Galiza, o atropelo tivo lugar sobre as 17.30 horas avenida Benito Vigo da Estrada, onde unha furgoneta atropelou a vítima mentres cruzaba a rúa. Ata a zona desprazouse un primeiro equipo sanitario do 061 e mesmo se valorou a posibilidade de activar o helicóptero medicalizado con base en Compostela. Con todo, os facultativos confirmaron que o home falecera como consecuencia do impacto. Ademais dos sanitarios, até o lugar, en pleno centro da Estrada, desprazáronse efectivos de Policía Local e membros do GES da localidade.

Efectivos de socorrismo localizaron e recolleron esta terza feira, 22 de agost, varios exemplares de medusas chegados a praias da comarca de Bergantiños, especialmente en Carballo e Malpica. As medusas foron recollidas e retiradas, aínda que non foi necesario pechar as praias ao baño. A especie que está a xerar “problemas” na zona é a Pelagica noctiluca, unha medusa de cor morada-parda que foi a atopada o sábado e que podería ser tamén a desta terza. No sur da Galiza e na Mariña, con todo, os fechamentos de praias das últimas semanas estiveron motivados pola presenza doutra especie, a 'carabela portuguesa' (Physalia physalis), que produce unha picadura moi intensa e con posíbeis efectos adversos.

Adegas da Denominación de Orixe O Ribeiro comezan esta semana a súa vendima, segundo informan. Trátase de cinco adegas que solicitaron facelo para recoller as uvas de maduración máis temperá, como algún godello de parcelas situadas en zonas baixas. Nun comunicado, a Denominación de Orixe Ribeiro explica que as condicións climáticas deste ano fixeron que o comezo da vendima se adiantase uns días con respecto a anos anteriores. Tras o control en viñedo dos inspectores do consello regulador, constatouse que "hai algunhas zonas e variedades de uva que se atopan nun excelente grao de maduración". "Esta vendima augúrase que será moi extensa no tempo", avanza a Denominación de Orixe, que explica que se calcula que sexa até mediados de outubro.

O prezo media da luz para os clientes de tarifa regulada vinculados ao mercado almacenista repuntará esta terza feira, día 22 de agosto, 2,9% con respecto á segunda feira, até situarse nos 120,67 euros por megawatt hora (MWh), tocando un novo máximo no que vai de mes de agosto. Por franxas horarias, o prezo máximo, de 158,61 euros/MWh, rexistrarase entre as 21 e as 22 horas, mentres que o prezo mínimo darase en catro horas, entre as 12 e as 16 horas, con 98,51 euros/MWh, segundo os datos provisionais do Operador do Mercado Ibérico de Enerxía (OMIE). Desta maneira, o prezo da luz desta terza feira será o máis alto nos dous últimos meses, tendo que retroceder até o pasado 22 de xuño, cando marcou 122,45 euros/MWh, para atopar un rexistro superior para un día.

A policía desmantelou unha plantación de marihuana que un veciño de Marín tiña no seu domicilio, polo que que se logrou desactivar un punto de cultivo e distribución de estupefacientes e deter o responsábel como presunto autor dun delito contra a saúde pública. O autor dos feitos, un home de 46 anos, convertera o seu piso, un ático dun céntrico edificio da vila, nunha auténtica "factoría verde" do cultivo de plantas de marihuana, segundo o corpo policial. Na comisaría de Marín recibíronse días antes da intervención unha serie de informacións sobre a posíbel actividade ilícita desenvolvida por este individuo, polo que os axentes iniciaron xestións de investigación.

O prezo media da luz para os clientes de tarifa regulada vinculados ao mercado almacenista subirá esta segunda feira, día 21 de agosto, outro 3% respecto ao domingo, e marcará o nivel máis alto en dous meses ao situarse en 117,25 euros por megawatt/hora (MWh). Por franxas horarias, o prezo máximo, de 149,58 euros/MWh, rexistrarase entre as 20 e as 21 horas, mentres que o prezo mínimo darase entre as 15 e as 16 horas, con 97,09 euros/MWh, segundo os datos provisionais do Operador do Mercado Ibérico de Enerxía (OMIE). Nestes 21 primeiros días do mes, a media do mercado eléctrico sitúase nos 91,04 euros/MWh, fronte aos 263,61 euros/MWh que rexistrou en agosto de 2022.

Os servizos de emerxencias traballan na extinción dun incendio que afecta dúas naves industriais situadas no municipio de Castro de Rei (comarca da Terra Chá), en concreto, no lugar de Casás, parroquia de Goberno. O incendio iniciouse nunha nave de labras de madeira e pasou a outra que contén madeira acumulada. Ademais, hai unha granxa de pitos nas proximidades, pero a certa distancia e con monte polo medio. No lugar traballan os Bombeiros de Vilalba, membros do GES da Pontenova, Garda Civil e tamén medios do distinto forestal da zona de Castro de Rei, xa que o lume estendeuse tamén ao monte.

Axentes adscritos á Comisaría de Policía de Ribeira detiveron dúas persoas como presuntos autores dun roubo con forza nunha embarcación pesqueira atracada no porto da localidade. Os feitos sucederon hai unhas semanas, cando o propietario denunciou que entraran na embarcación tras forzar a porta de acceso á cabina, e substraíran diversos efectos (GPS, tablet e sistemas de telecomunicacións, entre outros). Tras iniciar a investigación, púidose determinar a participación de varias persoas nos feitos, dos que dous foron localizados e detidos. Non se descarta que haxa máis detencións. A policía puido recuperar todos os efectos subtraídos.

A patrulla do Servizo de Protección á Natureza da Garda Civil da Coruña, en colaboración cun axente forestal do Distrito II, desmantelou un vertedoiro incontrolado nunha zona forestal da Zapateira, entre os municipios da Coruña e Arteixo. Segundo informa o corpo, os axentes realizaban labores de prevención de incendios forestais na zona cando observaron a presenza dun vertedoiro incontrolado formado por roupa ou colchóns. O vertedoiro, apuntan, "xeraba un grande impacto ambiental na zona, así como un risco en caso de producirse un incendio forestal", tendo en conta que o índice de risco diario de incendio (IRDI) está estabelecido como moi alto nesa zona.

O prezo media da luz para a clientela de tarifa regulada vinculados ao mercado almacenista subirá esta quinta feira, 17 de agosto, 7,67% con respecto a esta cuarta feira e situarase en 113,96 euros por megawatt/hora (MWh), o seu nivel máis alto no que vai de mes de agosto. Por franxas horarias, o prezo máximo, de 136,01 euros/MWh, rexistrarase entre as 21 horas e as 22 horas, mentres que o prezo mínimo darase entre as 14 e 15 horas, con 89,98 euros/MWh, segundo os datos provisionais do Operador do Mercado Ibérico de Enerxía (OMIE). Desta maneira, o deste quinta feira será o prezo máis alto do mercado almacenista para unha xornada no que vai de mes de agosto e o seu nivel máis alto desde o pasado 3 de xullo, cando superou os 117 euros/MWh.

Veciñanza de Recimil e Coeo en Lugo secundaron unha nova mobilización ante a Subdelegación do Goberno español para exixir a colocación dun semáforo no paso a nivel onde faleceron, en xullo, dous mozos. A protesta foi convocada polas representacións veciñais co obxectivo de reclamar a Adif que coloque un semáforo, á espera de suprimir o citado paso a nivel, principal demanda dos veciños. Fano despois de que protagonizasen diversas protestas para denunciar a falta de seguridade no paso a nivel sen barreiras e no que dous mozos, de 19 e 21 anos, faleceron cando o seu coche foi alcanzado por un tren de viaxeiros durante e arrastrado uns 200 metros.

O presidente do PP, Alberto Núñez Feixoo, convocou os deputados e senadores do seu partido a unha reunión esta cuarta feira pola tarde no Congreso, un día antes das sesións constitutivas desa Cámara e do Senado, previstas para a quinta feira. Esta será a primeira reunión do líder do PP con todos os seus parlamentarios tras as eleccións xerais do 23 de xullo e mentres se desenvolven as negociacións para a elección da Mesa do Congreso e a Presidencia da Cámara Baixa. A incógnita sobre quen presidirá o Congreso pode manterse ata o último momento xa que Junts convocou unha comisión executiva telemática para decidir a posición do partido na votación da Mesa do Congreso dos Deputados.

Dúas persoas resultaron feridas e tiveron que ser evacuadas ao hospital tras sufrir un accidente con tres coches implicados en Foz (A Mariña). Segundo informa o 112 Galiza, ocorreu na estrada que conecta Rapadoira e Llas. Un dos implicados contactaba coa central de emerxencias para alertar do ocorrido e precisar que había outros dous vehículos implicados. No operativo participaron Urxencias Sanitarias-061, que se encargou da evacuación en ambulancia ao hospital de Burela; así como a Garda Civil de Tráfico e a Policía Local de Foz. Así mesmo, informouse aos bombeiros de Barreiros, ao GES de Cervo e a Protección Civil.

O prezo medio da luz para os clientes de tarifa regulada vinculados ao mercado almacenista subirá esta cuarta feira, 16 de agosto,10,68% con respecto á xornada da terza feira e situarase en 105,84 euros por megawatt/hora (MWh). Por franxas horarias, o prezo máximo, de 136,1 euros/MWh, rexistrarase entre as 21 horas e as 22 horas, mentres que o prezo mínimo darase entre as 13 e 14 horas, con 86 euros/MWh, segundo os datos provisionais do Operador do Mercado Ibérico de Enerxía (OMIE). Nestes 16 primeiros días do mes, a media do mercado eléctrico sitúase nos 84,4 euros/MWh, fronte aos 145,13 euros/MWh que rexistrou no mesmo período de agosto de 2022.

Un home foi interceptado na cidade de Vigo tras provocar un accidente mentres conducía baixo os efectos do cannabis, sen carné e cun vehículo que non pasara a inspección técnica (ITV). Segundo informou a Policía Local produciuse un choque na rúa García Barbón. Unha vez no punto, realizóuselle unha proba de tóxicos a un dos implicados no mesmo, dando resultado positivo en cannabis e comprobándose que conducía sen carné porque nunca o obtiña e que o vehículo non tiña ITV. Por iso, foi citado para comparecer en xuízo rápido polos delitos cometidos contra a seguridade viaria.

A Garda Civil detivo en Mondoñedo a un veciño de Lourenzá, comarca da Mariña, de 58 anos, como suposto autor dos delitos de violencia doméstica, acoso, ameazas e contra a seguridade viaria. Os axentes trasladáronse ás inmediacións do domicilio da vítima após ter constancia de que o presunto infractor atopábase no lugar. Este, ao observar a presenza policial, fuxiu no seu vehículo sen deterse até a chegada á vivenda que ocupa na actualidade, onde tratou de esconder un arma de fogo entre a maleza. Ao ser recuperada, comprobouse que estaba cargada con tres cartuchos. Como o home presentaba síntomas evidentes de atoparse baixo os efectos do alcol, realizáronlle as probas de alcoholemia lanzando unha taxa de 0,75 miligramos. Así mesmo, interviuse no interior da vivenda outras tres armas de fogo e munición diversa. A persoa detida foi posta a disposición xudicial.

 

Unha muller e os seus dous fillos menores, un deles un bebé, resultaron feridos nun accidente de tráfico ocorrido a última hora deste domingo na localidade de Tui (Baixo Miño). Segundo a información trasladada pola central de emerxencias do 112-Galiza, ocorreu pasadas as 21.30 horas, cando o vehículo no que viaxaban envorcou lateralmente, a escasos metros dunha pendente, á altura de Pazos de Reis. Foi o concesionario o que avisou a emerxencias ao ter coñecemento do sinistro polo servizo de alertas. Até a zona desprazáronse efectivos sanitarios do 061, así como unha dotación dos Bombeiros de Ribadumia e os GES-Bombeiros de Ponteareas. Tamén foron avisados os membros do GES de Mos, os Bombeiros de Vigo, os axentes de Tráfico, da Policía Local e os efectivos da Agrupación de Voluntarios de Protección Civil da localidade. O persoal sanitario trasladou os tres feridos ao Hospital Álvaro Cunqueiro de Vigo, mentres os membros do GES-Bombeiros de Ponteareas procederon a estabilizar o vehículo.

Gadisa Retail conta cun persoal que supera os 8.000 traballadores e traballadoras, en concreto 8.216 persoas a peche do exercicio 2022, segundo informa. Nun comuncicado, indica que busca tamén "xerar riqueza sostíbel a través da captación e retención de talento, sumando 571 novos traballadores no últimos tres anos"."O propio modelo de negocio implantado pola compañía, coa atención personalizada no mostrador tradicional como aceno de identidade de Supermercados Gadis, actúa de panca xeradora de emprego cunha elevada profesionalización", indican.

Un home morreu na mañá desta sexta feira en Cariño (Ortegal), após envorcar o vehículo que conducía e quedar atrapado debaixo. Segundo informa o 112-Galiza, ocorreu antes das 8 horas da mañá na estrada que dá acceso á canteira de Landoi, na parroquia de Feáns. A alerta deuna un particular que atopou á vítima debaixo do vehículo. Seguidamente, o 112 avisou aos bombeiros do Eume e ao GES de Ortigueira para que o puidesen liberar e facilitar a atención dos sanitarios, que non puideron facer nada por salvarlle a vida. Até o lugar dos feitos tamén acudiron axentes da Garda Civil, que colaboraron cos equipos de emerxencias para tratar de solicitar toda a información do suceso.

O Concello de Santiago volveu decretar o feche e o precintado da discoteca Ruta, situada no ensanche compostelán, esta vez como sanción por incumprir a normativa de ruídos. Así o confirmaban fontes do Goberno local, que detallan que permanece fechada desde o 27 de xullo, unha vez pasadas as Festas do Apóstolo. Pese ao precintado, aínda está aberto o trámite da sanción por incumprimento da normativa de ruídos, á espera de que a empresa encargada do local (Apolo Universal SL) alegue o que estime oportuno e se resolva definitivamente.