Agora

Un total de 46.500 alumnos e alumnas, entre as 21.600 de 4º de Educación Primaria e 24.900 de 2º da ESO, comezaron esta cuarta feira as avaliacións de diagnóstico fixadas polo Ministerio de Educación a través da actual lei educativa, que proseguen na quinta. Após avaliárense ao longo da xornada de hoxe as competencias en lingua e literatura galega e castelán, esta quinta feira ocuparanse da lingua estranxeira e as matemáticas. Cada proba dura un máximo de 75 minutos e hai un descanso de media hora entre exames.

Simon Harris, do conservador Fine Gael, foi elixido a terza feira como novo primeiro ministro irlandés logo da dimisión do seu predecesor e correlixionario, Leo Varadkar, grazas ao apoio dos outros dous integrantes da coalición de Goberno, o tamén conservador Fianna Fáil e os Verdes, o que lle permitiu alcanzar 88 votos a favor, con 69 en contra. Harris xa era membro do Executivo e dirixía o Ministerio de Educación Superior.

A Copa Galiza de fútbol sala, na súa modalidade masculina -a feminina tivo lugar en Pontevedra hai dúas semanas e o Poio Pescamar logrou suceder no palmarés o Pescados Rubén Burela despois de superar as súas veciñas do Marín na finalísima- desenvolverase no Agustín Mourís de Noia. Iso significa que o único conxunto galego na Primeira División da Liga Nacional de Fútbol Sala (LNFS), o Noia Portus Apostoli, actuará como local nun choque que o enfrontará ao Parrulo Ferrol da categoría de prata o próximo 17 de maio, Día das Letras Galegas. Segundo explicou a Real Federación Galega de Fútbol (RFGF), a acción da XXXIII Copa Galiza comezará ás 12.30 horas.
 

Os sindicatos UXT, CCOO e CIG e mais os membros do comité de empresa de Fandicosta reúnense esta cuarta feira de novo con representantes da Xunta da Galiza para abordar os avances no proceso de venda da pesqueira galega. Segundo informaron onte fontes sindicais, o encontro decorrerá nas dependencias da Consellaría de Economía, Industria e Innovación en Santiago de Compostela, a partir das 12 horas, polo que prevén que acuda a conselleira, María Jesús Lourenzá. Os sindicatos solicitaron a semana pasada este encontro debido a que nos próximos días rematará o prazo da prórroga do preconcurso de acredores, ademais do actual expediente de regulación temporal de emprego (ERTE) que iniciou Fandicosta a comezos de ano mentres negociaba a venda.

Restan cada vez menos datas para a disputa da carreira de ciclismo de montaña 'BTT Os Picos de Mazaricos - Da Ruña ao Aro', que neste 2024 alcanza a súa oitava edición. Programada o próximo domingo, 14 de abril, Mazaricos conta as horas para unha nova xornada de competición "a través dalgunhas das paisaxes máis espectaculares da Costa da Morte e da comarca do Xallas", segundo destacan desde a organización. Esta proba xa veterana contará con dúas rutas de dificultade media, que sumarán cinco quilómetros máis que en 2023. Deste modo, o percorrido longo terá unha extensión de 50 quilómetros, mentres que o curto será de 40. As inscricións, confirma o Concello de Mazaricos, xa están abertas para calquera persoa interesada en participar que conte con máis de 16 anos de idade, podendo formalizar a mesma a través da internet.

A Fundación Provincial Banco de Alimentos de Vigo busca máis de 600 voluntarios e voluntarias en Pontevedra para poder desenvolver con éxito a súa acción Maio Solidario, organizada en supermercados Gadis. A pesar de que a campaña decorrerá ao longo de todo o mes de maio, Banco de Alimentos elixiu a primeira fin de semana, o 3 e o 4, para reforzala coa presenza física da chamada "marea azul" –a cor que visten as voluntarias deste proxecto–. Por iso, busca voluntarias e voluntarios que acodan aos estabelecementos , para o cal a asociación recorda que só é necesario dispor de catro horas durante eses días e inscribirse nun formulario habilitado na súa páxina web. En Vigo serán 300 as voluntarias mobilizadas; 75, en Pontevedra; 25, en Baiona, Mos, Tui, Marín, Bueu e Lalín; e 50, en Vilagarcía.

O pavillón do IES de Poio foi escenario dunha nova xornada da Conferencia Rías Baixas da Liga Atlántica de Billarda na que a gran dominadora foi Gharaboto. O azul das súas cores ocupou seis das nove prazas de podio en xogo (tres absolutas, tres femininas e outras tantas infantís) e, con todo, no plano colectivo a escuadra marinense empatou a 98 puntos con Lúa de Forza de Sanxenxo e Valpaços Terra Quente ficou a tan só tres de distancia (95), rematando xa máis lonxe Corredoiras (82), Armadiña (67) e Rinoceronte (36). Individualmente, Piru, Álvaro e Hugo (todos eles membros de Gharaboto) coparon o podio absoluto, rachando Tania (Valpaços) co seu dominio na feminina, onde estivo acompañada no caixón por Lita e Aldara. Finalmente, entre as crianzas impúxose Xián, de Lúa de Forza.

Rafael Grossi, director xeral do Organismo Internacional de Enerxía Atómica (OIEA), alertou na madrugada da segunda feira que o ataque ucraíno con drones contra a central nuclear de Zaporijia, baixo o control das tropas rusas, constitúe unha “importante escalada” para a seguridade atómica. Tres traballadores resultaron feridos no ataque. Ademais, tras negar Ucraína a súa autoría, Rusia denunciou un novo ataque cun drone.

Histórica clasificación do Hóckey Club Coruña Feminino para a 'Final Four' da WSE Champions League, a máxima competición a nivel continental. O mérito é duplo, tendo en conta que a formación tan só existe desde maio do pasado ano 2023, cando naceu para coller a remuda dun Liceo que decidira baixar a persiana da súa sección feminina.
Este logro chegou logo de que derrotaran no Pazo dos Deportes de Riazor o Astro Stuart Hóckei Clube de Massama portugués por un contundente 8-0, que se uniu ao 0-2 logrado na pista do conxunto luso para chegar ao 10 a 0 global, que dá dereito a soñar con todo nunha final a catro que terá lugar entre os días 27 e 28 de abril. 

A Garda Civil auxiliou sete peregrinos que se dirixían nun microbús a un hotel no Cebreiro tras quedar atrapado nun camiño deste municipio. Segundo trasladou o Instituto Armado, os feitos tiveron lugar ás 23 horas do pasado sábado a un quilómetro do hotel onde tiñan previsto aloxarse e iniciar á mañá seguinte a ruta cara a Santiago. Ao parecer, a condutora do microbús accedeu ao camiño por indicación do GPS e o vehículo quedou atascado polo barro e restos de neve existentes na vía. Os peregrinos foron trasladados por persoal do centro hostaleiro que tiñan contratado e, tres horas máis tarde, puido retirarse o autobús coa colaboración da patrulla da Garda Civil que acudiu ao lugar. A continuación, a condutora, que trasladaba os peregrinos desde Madrid, emprendeu a viaxe de volta ao redor das 2.30 horas do domingo.

A Xunta da Galiza destina un orzamento de 20.000 euros a escritoras e escritores que queiran fomentar a difusión das letras galegas fóra da Galiza cos seus proxectos, así como impulsar a cooperación con organismos e centros culturais. As persoas creadoras que necesiten traducir as súas obras, que necesiten desprazarse para un proceso de investigación previo ou que necesiten un espazo e ambiente de traballo concreto para continuar cun proxecto xa iniciado poden solicitar unha axuda de 5.000 euros até o 15 de xullo, que poderán destinar a cubrir os gastos de viaxe, de transporte internos, de aloxamento e manutención, así como de subscrición a unha póliza de seguro de viaxe e outra médica. É a segunda convocatoria no marco do Plan Xeración Cultura.

O Instituto Xeográfico Nacional (IXN) detectou durante a madrugada deste domingo un terremoto de 2,9 graos de magnitude con epicentro no municipio de Pantón, na comarca de Terra de Lemos. Segundo informa na súa páxina web, o tremor, de intensidade 3 na escala de Richter, rexistrouse ás 05.23 horas. De diferentes modos o sismo sentiuse tamén na localidade de Monforte de Lemos, na parroquia de Distriz, e nas parroquias de San Martiño de Siós e Cima de Vila, en Pantón. As comarcas de Allariz-Maceda, O Condado e Terra de Celanova así como o territorio situado fronte á costa Ártabra tamén rexistraron movementos sísmicos perceptíbeis nos últimos días, concretamente en Xunqueira de Ambía, Padrenda e Mondariz, ademias do cuarto no océano Atlántico.

A Policía detivo un home como presunto autor do asasinato a tiros na noite do sábado doutro varón de 57 anos en Vigo. Segundo confirmaron a 'Europa Press' fontes da investigación, a detención produciuse sobre a unha da madrugada e os axentes incautaron un arma de fogo. Os feitos sucederon sobre as 23 horas no barrio de Coia. A esa hora, varios veciños da contorna escoitaron dous disparos. Ao chegar ao lugar, os servizos de emerxencias e axentes da Policía confirmaron que o home falecera no acto. Brigadas da Policía Científica e de Homicidios investigan o sucedido. O caso está en mans do Xulgado de Instrución número 2 de Vigo, que é o que está de garda. Fontes xudiciais sinalaron que se non se prevé que o detido pase este domingo a disposición xudicial.

A Garda Civil interceptou o condutor que, na tarde desta sexta feira, circulou en sentido contrario pola Autovía do Barbanza e triplicaba a taxa de alcol. Segundo informou, o home, de 38 anos, deu negativo nas probas de drogas e nas de alcol lanzou un resultado de 0,79 mg/l en aire expirado. O suceso produciuse minutos despois das 20 horas cando o 112 recibiu varias chamadas de particulares que alertaban de que un turismo circulaba en sentido contrario pola AG-11, á altura do km 23, en dirección Padrón polos carrís sentido Ribeira. O vehículo tomou a saída cara a unha área de servizo, no km8, e reincorporouse á autovía en sentido correcto. Sobre as 20.17 horas, unha patrulla localizou e detivo o condutor por un delito de condución temeraria superando as taxas máximas estabelecidas.

A Vicepresidencia da Deputación de Lugo vén de abrir a convocatoria das súas axudas a deportistas que practiquen modalidades individuais. Cun investimento total de 100.000 euros, a área de Deportes distribuirá 230 bolsas destinadas a financiar gastos derivados da actividade competitiva, "apoiando e fomentando a súa participación nas distintas competicións". Así o apuntou o vicepresidente da Deputación, Efrén Castro, engadindo que a convocatoria "trata de responder, sobre todo, ás súas necesidades en etapas de iniciación, e, polo tanto, de colaborar nuns gastos que atenden fundamentalmente as familias, desde licenzas ou inscricións até transporte ou material deportivo". 

O mellor ciclista da época actual e o gañador das dúas últimas edicións da Volta á Galiza -a máis recente disputada hai apenas un mes e medio-, Jonas Vingegaard, permanece ingresado nun centro hospitalario de Euskadi logo da durísima caída que sufriu durante a pasada quinta feira no marco da cuarta etapa da Itzulio. As consecuencias para o danés foron unha fractura de clavícula, varias costelas rotas, contusión pulmonar e un neumotórax, sendo a súa condición "estábel", tal e como explicou o seu equipo, o Visma-Lease a Bike, nun comunicado. Vingegaard non foi o único corredor afectado, pois Remco Evenepole fracturou a clavícula e a escápula; Sean Quinn, rompeu o esternón, ademais de padecer unha conmoción cerebral. Steff Cras tamén ten un neumotórax.

O domingo inician en Ruanda os actos de conmemoración do 30 aniversario do comezo do xenocidio no país, no que foron asasinadas 800.000 persoas, impulsado polo Goberno de ultradereita ruandés, controlado polos hutus, contra os tutsis. Ambas as dúas categorías foron determinadas polos colonizadores belgas en base á clase social da poboación local, 
e non ten ningunha relación cunha cuestión étnica.

O candidato do PP á Presidencia da Xunta da Galiza, Alfonso Rueda, tomará posesión do seu cargo o próximo sábado, 13 de abril, na igrexa de Bonaval, en Compostela, onde se sitúa o Panteón de Galegas e Galegos Ilustres, como quinto presidente da Galiza na XII Lexislatura. O mesmo fixo Gerardo Fernández Albor (Alianza Popular), primeiro presidente da Galiza elixido polo Parlamento galego ao remate da ditadura franquista.

Froito da colaboración entre o proxecto 'Castelos no aire' de investigación arqueolóxica sobre as fortificacións altomedievais galegas e a comunidade de montes veciñais da Picoña, esta semana comezou unha campaña de escavación arqueolóxica no Alto de San Cibrán, situado na extrema entre as parroquias de Guláns, en Ponteareas (O Condado), e A Picoña, en Salceda de Caselas (comarca de Vigo). Os traballos diríxeos o investigador e arqueólogo do grupo de investigación Síncrisis da USC Mario Pereiro, que explica que o Alto de San Cibrán –lugar de referencia para as dúas parroquias que acolle unha romaría dúas veces ao ano– agocha un recinto fortificado "moi interesante, cunha extensión próxima ás 5 hectáreas e cunhas evidencias construtivas aínda recoñecíbeis".

O colectivo de persoas xubiladas e pensionistas da CIG concentráronse esta quinta feira ás portas do edificio administrativo da Xunta da Galiza para trasladarlle ao novo Goberno galego as súas cinco demandas esenciais para dignificar a vida das persoas maiores: recuperar a sanidade pública galega, un sistema público de servizo de atención ás persoas, recuperar a atención sen cita previa, un plan de envellecemento activo e reforzar as pensións.