Agora

Nas Canarias, o modelo turístico levou a que cada vez máis persoas se vexan obrigadas a vivir en chabolas, covas e incluso nos seus vehículos pola alza da vivenda causada por, entre outros, polo avance dos pisos turísticos. Neste sentido, as oito illas desenvolverán o sábado mobilizacións para protestar por este modelo, a masificación e a falta de protección de residentes e natureza, instando a frear o crecemento de aloxamentos turísticos.

Pescados Rubén Burela e O Castro Bloques Cando enfróntanse este sábado (Pavillón de Vista Alegre, 20 horas) nun derbi no marco da xornada 25 da Primeira División de Fútbol Sala coa idea de sacar a espiña da súa prematura eliminación da Copa da Raíña a pasada fin de semana, onde ambas as formacións caeron nos cuartos de final. Mais non será este o único duelo interesante na máxima categoría estatal con maior peso da representación galega, pois o Poio Pescamar continúa ás 18 a súa persecución dos postos de play-off recibindo na Seca o Leganés, fechacancelas con só catro puntos. Nun escenario diametralmente oposto, o Viaxes Amarelle colide na Sagrada Familia co segundo clasificado, Atlético Navalcarnero (18 horas). O Marín, pola súa parte, visita o campo do Les Corts barcelonés ás 16.15.

Un conato de incendio declarado entre dous coches dun tren que cobre a liña entre A Coruña e Vigo obrigou a atrasar a saída do servizo desde a estación da cidade herculina durante 40 minutos. O tren tiña prevista a súa saída ás 9 horas desta sexta feira da estación da Coruña con destino a Vigo, mais a declaración dun pequeno incendio obrigou a desaloxar o tren e estabelecer medios alternativos, segundo trasladaron fontes de Renfe. O incidente atrasou a saída do servizo, que, finalmente, puido partir da Coruña ás 9.40 horas.

Na declaración conxunta despois da reunión do presidente colombiano, Gustavo Petro, e brasileiro, Lula da Silva, Petro comunicou na madrugada da quinta feira o seu interese en sumarse ao grupo Brics o antes posíbel, o que foi acollido “con beneplácito” por Lula, que “se comprometeu a promover a candidatura de Colombia” e propuxo unha “alianza estratéxica” bilateral para incrementar o peso internacional de ambos os dous países.

O Paraninfo da Universidade de Santiago de Compostela (USC) acolleu esta quinta feira a entrega dos Premios á calidade lingüística dun total de 25 traballos realizados no curso 2022-2023 en galego, un galardón que cumpre 20 anos fomentando unha cultura de calidade e o uso do idioma entre o alumnado. A USC é unha universidade que "traballa pola lingua" propia e "por facer ciencia e coñecemento tendo como referente á Galiza", destacou o reitor Antonio López neste acto.

As últimas prazas que dan dereito a disputar a fase de ascenso á categoría estatal de balonmán decidiranse en Carballo. Tanto mañá sábado como o domingo, 21 de abril, o Pavillón Vila de Noia acollerá unhas finais sénior a 4 que abrirán os homes ás 10.30 horas desta sexta feira cunha semifinal entre Magope Seis do Nadal e SAR Plastic Omnium, saíndo o outro finalista do choque O Grove Paraíso Rasoeiro-Mecalia Atlético Guardés. Xa pola tarde será a quenda das mulleres, enfrontándose Tapería Dos Chata Balonmán Cangas e a Asociación Deportiva Carballal ás 16 horas e o local Calvo Xiria co Lavadores de Vigo ás 18. Para o domingo será tempo dos partidos polo terceiro e o cuarto posto -10.30 masculino e 12.30 feminino-, ficando a finalísima dos rapaces ás 16.30 horas e a das rapazas ás 18.30.
 

O Centro Tecnolóxico do Mar-Fundación Cetmar e a Universidade de Santiago de Compostela (USC) traballan nunha investigación europea, xunto a máis dunha ducia de institucións de cinco países, para reducir a captura incidental (non desexada) de megafauna mariña ameazada. Esta acción interdisciplinar busca proporcionar coñecementos prácticos que permitan mellorar os sistemas de observación, protexer a biodiversidade mariña e promover prácticas pesqueiras máis responsábeis. Coordinado pola Universidade de Barcelona, o proxecto comezou en xaneiro de 2024 a súa actividade e prolongaranse até decembro de 2027. Está financiado pola Unión Europea a través do programa Horizonte Europa.

A Garda Civil do Grove (O Salnés) interveu na PO-316 un camión portugués con 1.674 quilogramos de ameixa xapónica sen documentación. Segundo informaron, os feitos sucederon o pasado domingo cando comprobaron que a carga dun camión isotermo era unha gran cantidade de sacos deste bivalvo. Ao requirirlle ao condutor a documentación para o transporte manifestou que carecía dela, que a trae desde Portugal e o destino era unha depuradora do Salnés. A patrulla púxose en contacto coa confraría de pescadores do Grove e procederon a trasladar o camión á lonxa para a pesada dos sacos. Así, tratábase de 93 sacos de ameixa xapónica, algunha delas non regulamentaria por non dar a talla, cun peso total de 1.674 quilogramos.

O voceiro do Kremlin, Dmitri Peskov, indicou a cuarta feira que as arredor de 2.000 tropas rusas que integran o continxente de paz despregado en Artsakh desde a fin do conflito bélico con Acerbaixán de 2020 iniciaron a súa retirada da zona tras a disolución da república autoproclamada homónima, logo da fuxida de máis de 100.000 persoas armenias a raíz dun ataque de Acerbaixán contra o territorio en setembro de 2023.

O Feile, a competición infantil de fútbol gaélico máis importante do que nese deporte se coñece como 'Rexión Europa' -que abrangue a todo o continente agás as illas de Irlanda e a Gran Bretaña- chegará á Galiza, e máis concretamente a Vigo. A sede escollida foi o Colexio Montecastelo da cidade olívica, e a data o sábado 27 de abril. Até alí viaxarán 11 equipos procedentes, ademais da Galiza, de Francia, Bélxica, Alemaña, Luxemburgo, Países Baixos e Suíza. Con respecto aos boletos, o Keltoi, responsábel da organización, confirmou que o acceso será de balde para todas aquelas persoas interesadas en asistir, e que os partidos desenvolveranse entre as 9.45 e as 18 horas.

A cidade olívica torna o próximo sábado, 20 de abril, na capital estatal do Roller derby co gallo da disputa da Segunda División do Campionato da ARDE (Asociación Roller Derby de España). Alí, concretamente no Pavillón Monte da Mina, entrarán en xogo as locais das Sereas Bravas e as coruñesas das Brigantias -que saíron vitoriosas do derbi da última data- nunha intensísima xornada que as levará a xogar até dous partidos. En primeiro lugar, As Brigantias colidirán ás 12 horas co Roller Derby Madrid 'B', un choque que dará paso, xa ás 14 horas, ao debut das Sereas Bravas fronte outra formación da capital do Estado, Black Thunders. Pola tarde (16 horas), as xogadoras coruñesas volverán saltar ao parqué da Mina para enfrontarse ás Black Thunders, baixando o pano o Sereas-Madrid 'B' ás 18.

A Carreira de Montaña polos Montes de Viveiro-Gran Premio Xacobeo, máis coñecida polo seu acrónimo Camovi,  regresa esta fin de semana -concretamente o sábado 20 e o domingo 21 de abril- para alcanzar a súa edición número 13, que segundo datos oficiais contará con, canto menos, 900 deportistas inscritas nas distintas modalidades que ofrece o certame.  Neste ano 2024 os percorridos argallados pola organización foron de 42, 21 e 10 quilómetros no plano individual; unha carreira de remudas de 42 quilómetros; a clásica andaina e unha proba denominada 'Camovi Kids', que ten como obxectivo fomentar o deporte entre os nenos e nenas. Efrén Castro, vicepresidente da Deputación de Lugo -entidade que colabora coa organización-, destacou no acto de presentación, que tivo lugar na sede da Delegación Territorial da Xunta, a "variedade de modalidades" e a "esixencia física" desta Camovi de 2024. O evento servirá, a maiores, para homenaxear o desaparecido alpinista ourolense Ramón Blanco, que faleceu o pasado mes de agosto aos 90 anos de idade. Emigrado en Venezuela e habitual da Camovi -a derradeira vez que participou foi en 2018, cando completou os 42 quilómetros a pesar da súa avanzada idade-, o seu nome saltou aos titulares de prensa en 1993, cando foi quen de coroar o Everest.
 

Medios internacionais confirmaron a terza feira que Markus Pieper, eurodeputado da Unión Demócrata Cristiá alemá (CDU), renunciou como enviado especial da Unión Europea (UE) para as pemes horas antes da que sería a súa primeira xornada laboral no posto. A presidenta da Comisión Europea, Ursula von der Leyen (CDU), foi acusada de favoritismo na súa contratación, cuestionada por varios comisarios e polo Parlamento da UE.

O facho olímpico dos Xogos de París 2024 acendeuse onte nunha cerimonia na cidade grega de Olimpia, o lugar de nacemento do evento, iniciando así a súa viaxe cara á capital francesa, onde chegará o 26 de xullo. Durante un ritual que une os modernos Xogos Olímpicos coas súas antigas orixes, o facho foi acendido diante das ruínas do templo da deusa Hera, desde onde foi trasladado á embaixada francesa en Atenas para despois subir a bordo do Belem -un famoso barco de tres mastros botado en 1896-, que o trasladará até Marsella, cidade gala na que atracará 0 8 de maio. Entón iniciará unha peregrinación de 68 días por territorio francés, concluíndo o antedito 26 de xullo, cando alimentará o pebetero co seu lume.
 

O Rally de Narón regresará o próximo mes de maio para levar a cabo a súa edición número 36. O veterano certame automobilístico, que se disputa desde 1988 -coa única interrupción de 2020 a causa da pandemia da Covid- formará parte, ao igual que o ano pasado, da Copa de España de Rallys de Asfalto e, ao mesmo tempo, tamén será puntuábel para o primeiro 'Trofeo Tracción Traseira Fam-53'. Esta nova cita da competición naronesa terá lugar ao longo dos días 24 e 25 de maio, tal e como se indicou nun acto de presentación no que estiveron presentes, entre outros cargos e autoridades vinculadas á organización, Antonio Sueiras (presidente da Escudería Siroco) e a alcaldesa Marián Ferreiro. Segundo explicaron, o percorrido constará dun total de 400 quilómetros, e decorrerá, ademais de por Narón, polos concellos veciños de San Sadurniño, As Somozas, Moeche e Cerdido.

 

Esta quinta feira dará comezo a segunda edición da Feira da Sostibilidade organizada polo colectivo de alumnado e profesorado Eco-Étika e que decorrerá no IES Luís Seoane, en Pontevedra, durante os días 18, 19 e 22 de abril. O colectivo Eko-Étika desenvolveu o curso pasado unha primeira edición da Feira da Sostibilidade -galardoada co premio á Innovación Educativa da Xunta da Galiza-, a cal se converteu no primeiro espazo de encontro na Galiza que une comunidades educativas, institucións, asociacións ou comercios de proximidade nun mesmo espazo coa intención de tecer redes asociativas críticas e activas para traballar de forma conxunta por construír unha sociedade sostíbel.

O BNG iniciou unha campaña para reclamar o arranxo das estradas de titularidade estatal baixo o rótulo 'Arranxo xa das nosas estradas', ao considerar que son infraestruturas esenciais e estratéxicas para o desenvolvemento social e económico da comarca de Lugo e as veciñas. "A situación actual de abandono de estradas e autovías como a A-6 ou as N-VI, N-540, N-640 e N-120 pon en perigo a seguranza das persoas que transitan por elas de forma diaria", denunciou a formación. Tamén coa presenza do deputado nacionalista no Congreso, Néstor Rego, cargos institucionais e orgánicos do BNG e militantes da organización presentaron esta nova campaña baseada na realización de actos e na recollida de sinaturas e que procura o apoio veciñal ante o "abandono das infraestruturas viarias".

Un home de 92 anos faleceu na madrugada desta terza feira no Hospital Lucus Augusti de Lugo como consecuencia das feridas sufridas o pasado domingo tras caer por un terraplén na Fonsagrada (comarca homónima). O home atopábase hospitalizado desde a tarde do domingo, cando foi rescatado polos servizos de emerxencia do lugar polo que caeu cando camiñaba pola parroquia de San Pedro de Maderne. O ancián dirixíase a unhas colmeas da súa propiedade cando esvarou e se precipitou por un barranco. Durante a caída, sufriu varias contusións que requiriron o seu traslado ao hospital, onde faleceu.

Un incendio forestal declarado na tarde desta segunda feira e que permanece activo en Crecente (A Paradanta) supera xa as 50 hectáreas afectadas, segundo o último balance ofrecido pola Consellaría do Medio Rural. O lume iniciouse minutos antes das 20 horas da segunda feira en tres puntos distintos da parroquia de Angudes, o que apunta a que podería ser intencionado. Á primeira hora da mañá desta terza feira continúa activo, aínda que Medio Rural sinala que a evolución é favorábel e espera dalo por estabilizado (paso previo ao seu control). Na zona traballaron até o momento un técnico, 11 axentes, 21 brigadas, seis motobombas, dúas pas, dous avións e dous helicópteros.

Este sábado, 20 de abril, o auditorio Espaço Vita de Braga vivirá unha reedición da gala aRi[t]mar 2023. A gala servirá de feche ao Congreso Internacional de Estudos Galegos, que reunirá nesta cidade portuguesa estudosos e estudosas de todo o mundo. A organización destacou a importancia da colaboración entre as entidades pertencentes á Rede da Galilusofonía na realización desta gala, así como a natureza expansiva da iniciativa aRi[t]mar, que naceu como un proxecto "intramuros" da Escola Oficial de Idiomas de Compostela, gañando popularidade até chegar a todo o territorio galego e a Portugal.