Por que non sai Skywalker no trailer? Por que non no cartaz? Falo de Luke, non de Leia. Aparecerá na fita? Pasaríase ao lado escuro? Tanta incerteza non sei se a darei aturado. Nen sequer lin Boyero. A mesma incerteza paira sobre o 20D, abocado, seica, a unha foto finish.
Nunca desde 1977 houbo tanta incerteza perante unhas eleicións xerais. Ten certa lóxica, desde que hai máis ofertas no trinque, algunhas -Ciudadanos, Podemos- sponsorizadas por poderosas canles televisivas. Como no comezo da Primeira Transición Borbónica -estamos nas vésperas da segunda-, a cuestión verdadeiramente chave para o país é garantir presenza directa, sen intermediarios, nas cámaras parlamentares estatais. Iso, segundo a información que publicamos esta sexta feira, é posíbel, mais tamén haberá que estar pendente da foto finish. A sensación é que a campaña de Nós Candidatura Galega -fresca, potente, renovadora- está indo cara arriba e que ten o obxectivo ao alcance da man. Quen se interpón no camiño é o PP en Pontevedra e o PSdeG na Coruña, o vello bipartidismo face o soberanismo galego, a metáfora do que acontece no Estado, o réxime asediado polas forzas autodeterministas (un réxime que aspira a re-perpetuarse baixo novas formas e marcas).
Non me fagades spoiler, please, non quero saber se sae Luke ou non antes de tempo.