20 de maio. 9.00 h. Maitines en Génova
Despacho do presidente do PP. Cafés. Croissants. Algún cigarro clandestino. O inevitábel charuto pendurado de medio lado da boca de Mariano, cavidade asimétrica e desencaixada.
Que facemos con Cañete?, pergúntanse angustiados os fontaneiros de Génova mentres o arúspice Arriola se reintroduce na cociña demoscópica por ver se o exabrupto machista do ex ministro pode desaletargar a sectores abstencionsitas. Que facemos, Mariano? Mariano, cada día máis certo de que Cristiano Ronaldo si estará en Lisboa, suga largamente no charuto, xoga cos tempos e entretense coas volutas do tabaco, o seu estilo de condución é ese, o de dar a impresión de que en calquer momento lisca da Moncloa e volta ao seu escritorio de rexistador da propriedade en Santa Pola.
"Paula Prado é a portavoz do partido e silenciar a túa portavoz, sen cesala, é unha das maiores proezas da política occidental das últimas décadas"
-Tranquilos, rapaces, faremos o que está a facer Feijóo na Galiza -moumea ao fin sen apenas mover as comisuras dos beizos, con esa dicción pastosa -os spaguettis entre os dentes, que diría Felipe González- que o caracteriza.
-¿¿¿???
-Si, tíos, o que está a facer Feijóo con Paula Prado. Facela desaparecer. Pendurar algunha foto dela en twitter nalgún mitin ignoto, pouco máis.
-Facemos desaparecer o noso candidato, Mariano?
-Non digo iso, je, je -retruca Rajoy mentres de esguello non perde de vista -ten o Marca estendido sobre a mesa do seu despacho- que Karim sofreu algunhas molestias no último treino. Digo que basta con non o enviar a algunha entrevista digamos delicada, nada máis. Se reparades, o de Feijóo é aínda máis heavy.
-Por?
-Porque Paula Prado é a portavoz do partido e silenciar a túa portavoz, sen cesala, é unha das maiores proezas da política occidental das últimas décadas.
Todos estiveron de acordo.
20 de maio. 13 h
4% de share, menos de 900 mil persoas. Colleita do debate a 6 na TVE. Non por sacrificar o pluralismo político -excluíuse a candidatura de Os Pobos Deciden- se obtén máis audiencia. O formato de debate como sucesión de monólogos, sen que a moderadora achegue un argumento ou provoque ningunha reflexión, non leva a ningures. Só a zapear. E despois está González Pons. Nunha das súas primeiras intervencións, púxose estupendo e largou sen despeitearse que "España" volta a ser a "Alemaña do Sul de Europa". Para escapar.
20 de maio. Por volta das 20 h.
Non dou crédito á noticia: a Xunta Eleitoral Central dá a razón ao recurso de UpyD e ordena modificar o plano de cobertura aprobado pola CRTVG coa intención de deixar fóra dos espazos informativos o BNG.
O argumento da XEC non hai por onde collelo: o ámbito de difusión da TVG é Galiza e en 2009 103 mil persoas votaron BNG nas eleccións europeas. A XEC di que non, que votaron unha coligación chamada Europa dos Pobos, que esa coligación obtivo un escano e que ese escano pertenceu a maior parte do tempo a ERC. Mas o certo é que en 2009 o BNG fixo campaña como tal en Galiza e que as papeletas que os votantes introduciron as urnas eran do BNG, levaban o logo do BNG, eran votos nacionalistas galegos.
Digamos que a XEC é un órgao xudicial, mas controlado politicamente, xa sabemos como funciona a división de poderes no EE. Digamos que do que se trata é de que a sociedade tome nota de a quen os poderosos consideran mal@s, malotes. Pois si, a eses, ás e aos nacionalistas galegos. Hai que poñelos fóra de todo, ordenan desde Madrid, até da televisión galega, as outras xa nin as cheiran.
O sistema sabe perfeitamente quen está dentro e quen está fóra.