Opinión

Salvemos a Atención Primaria

"Sexa a suprema lei, a salvación do pobo".
Cicerón (106 a.C.-43 a.C.), xurista, político,
filósofo, escritor e orador romano.

Atendendo á Lei 7/2015, de Iniciativa Lexislativa Popular e participación cidadá, a Plataforma SOS Sanidade Pública de Galicia vai presentala no Parlamento Galego.

O Estatuto de Autonomía, outorga as competencias no desenvolvemento lexislativo e a execución da lexislación básica en materia de sanidade interior; así, despois das dúas modificacións feitas polo PP da Lei Galega de Saúde (2008), entendemos que o desmantelamento da Atención primaria provocado polos 13 anos do Sr. Feijóo (e catro conselleiros e conselleiras de Sanidade) non pode seguir producíndose, e por iso, solicitamos ao Parlamento de Galicia que acepte e tome en consideración esta Proposición de Lei; unha vez cumpridos os trámites legais, incluída a recollida de 15.000 sinaturas debidamente autentificadas, e se publique conforme ao artigo 123 do Regulamento da Cámara para a súa toma en consideración no Pleno e subseguinte tramitación parlamentaria.

O sistema sanitario galego arrastra unhas debilidades que se agravaron durante a pandemia: falta de accesibilidade, longas listas de agarda, indubidable fatiga do persoal ou a escasa participación da cidadanía no sistema. O obxectivo da Proposición de Lei é "a implantación dunha serie de medidas para revitalizar e fortalecer a Atención Primaria".

Establécese a atención presencial ao paciente nas consultas. Só se o paciente opta voluntariamente por ser atendido de forma telemática, poderase levar a cabo a consulta por outros medios (humanos non máquinas).

Establécese unha serie de medidas para fixar uns mínimos razoables de dispoñibilidade de centros e persoal para salvagardar a debida calidade de atención aos pacientes. Obrigación de ofertar, como mínimo, unha convocatoria de prazas anual. Recuperación dos consultorios periféricos. Adecuar os cadros de persoal ás necesidades da poboación e cunha atención de calidade. No caso das consultas médicas establecerase un máximo de 30 consultas diarias. Ofertar ao novo persoal especialista contratos estables. Garantir unhas condicións laborais dignas, que acaben coa precariedade e a inestabilidade do persoal e que permitan recuperar ao que decidiu traballar en lugares diferentes da Galiza.

Recuperación das Xerencias de Atención Primaria en cada área sanitaria, con orzamento propio e capacidade de xestión autónoma.

Recuperación e posta en marcha das competencias dos Consellos de Saúde de Área Sanitaria e do Consello de Saúde de Galicia. Órganos de participación democrática na xestión das áreas sanitarias.

O persoal dos centros de saúde, consultorios periféricos e PAC, deberán poder garantir unha atención de calidade e con plena capacidade resolutiva. A composición dos cadros será definida polos Plans de Saúde de Área Sanitaria. Para que o servizo sexa integral, os centros de saúde deben contar con profesionais que cubran toda a asistencia sanitaria: psicólogos clínicos, logopedas, fisioterapeutas, terapeutas ocupacionais, traballadoras sociais, etc.

Adecuar os servizos de ambulancia ás necesidades e demandas de atención e traslado urxente.

Acabar coas Listas de agarda na Atención Primaria. Garantirase que o tempo de espera para recibir atención nos centros de saúde non superará as 48 horas para consultas normais e 24 horas para a demanda urxente.

As interconsultas e derivacións de pacientes aos especialistas hospitalarios, non pasarán por ningún filtro previo que alongue a espera da atención. Permitir que as médicas de AP remitan os pacientes que consideren á consulta urxente de cada especialidade sen ter que facer informe previo e a demora conseguinte de varios días.

O Consello Técnico de Atención Primaria de Galicia será o garante de que o novo modelo de Atención Primaria de Galicia sexa o que termine co desmantelamento e privatización do sistema sanitario público galego. De nós depende!

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios