O Cuarto Inventario forestal estatal, no que fai referencia a Galiza, indica que os montes galegos alcanzan un valor socio-medioambiental superior aos 1.131 millóns de euros anuais. Nestes valores sociomedio-ambientais atópanse: a captura de carbón, a provisión das augas, a conservación da biodiversidade, o control da erosión, servizos socio-recreativo... A parte alicota a esta aportación dos montes veciñais en man común (tomando como patrón a superficie) alcanza os 598 millóns de euros anuais. De non existir os montes, os custos destes servizos, necesarios para a existencia, teria que sufragalos a sociedade no seu conxunto. Daí que non sexa nada esaxerado solicitar compensacions (non somentes económicas) para os titulares dos montes por estes servizos socio-medioambientais .
Mais para que os montes galegos cumpran (e sigan a cumprir) esta función socio-medioambiental é preciso que a posta en valor destas terras, sexa multifuncional e sustentábel. É dicir, totalmente contrario ao que indican as directrices para a revisión do plano forestal de Galiza, que van ser aprobadas polo Partido Popular. Directrices que apostan pola produción de madeira de puco valor engadido, pola biomasa forestal e polos cultivos enerxéticos. Que apostan pola produción forestalista, mesmo por riba de condicionantes medioambientais.
Para o Partido Popular, a posta en valor dos montes veciñais é somentes forestalista. E para cumprir este obxetivo, aplica un intervencionismo salvaxe
![Publicidade 195634]()
Para o Partido Popular, a posta en valor dos montes veciñais é somentes forestalista. E para cumprir este obxetivo, aplica un intervencionismo salvaxe. A última mostra deste intervencionismo salvaxe atopámola este mesmo mes coa promulgación do Decreto, este mesmo mes, polo que se regula o reinvestimento de todos os ingresos obtidos polos montes veciñais en actuacions de mellora e protección forestal. Este reinvestimento obrigado é do 40% de todos os ingresos. E se non se fai, as comunidades de montes serán castigadas sen poder ser beneficiarios de ningún tipo de axuda. Agora ben, se ese mesmo monte veciñal é xestionado por unha empresa forestal privada, este reinvestimento obrigado desaparece.
Este intervencionismo salvaxe do Partido Popular nos montes veciñais en man común ten como obxetivo o sacarlle a capacidade de decisión sobor as súas terras, as comunidades de montes. De feito, non somentes obriga a reinvestir o 40% de todos os ingresos do monte. Mesmo indica en que actuacions hai que facer este reinvestimento. Así, a defensa xurídica das comunidades de montes para loitar contra as usurpacions e ocupacions dos montes veciñais non entra nese 40% de reinvestimento obrigado. Se unha asemblea xeral dunha comunidade de montes decide unha actuación no monte e esta non está contemplada no plano de ordenación (documento feito a 10 anos vista), entrará ou non no reinvestimento obrigado, se lle parece ben a Consellaría do medio rural. Se unha comunidade de montes decide levar adiante unha actuación de carácter social, cultural, patrimonial ou medioambiental somentes poderá gastar nestas actuacions o 10% do 40% do reinvestimento obrigado.
O intervencionismo do Partido Popular nas comunidades de montes veciñais en man común raia no enfermizo. É unha manía persecutoria. Boa proba disto témola nas subvencions. A cuantia das subvencions entra no montante dos ingresos obtidos pola comunidade veciñal. Cuestion de imposíbel cumprimento xa que as subvencions son finalistas. É dicer, hai que investila no proxecto que foi subvencionado. Se se quere cobrar os cartos da subvención, hai que facer o proxecto que foi subvencionado.
O intervencionismo do Partido Popular nas comunidades de montes veciñais en man común raia no enfermizo
![Publicidade 195720]()
Fagamos un exercicio práctico. Supoñamos unha comunidade de montes que ten uns ingresos anuais de 100 euros, desglosados do seguinte xeito (20 da venda de madeira, 20 do parque eólico e 60 dunha subvención para pór en valor un castro). O reinvestimento obrigado que ten que facer esa comunidade de montes é de 40 euros. A subvención para pór en valor o castro era do 80%, polo que tivo que pedir un préstamo de 100 euros, que agora ten que devolver Polo tanto, os cartos que lle quedan a comunidade de montes para investir e de 20 euros. A comunidade de montes non poderá investir o 40% dos ingresos no monte e, xa que logo, será castigada a non poder ser beneficiaria de ningún tipo de subvención.
Disque o Partido Popular bebe da corriente liberal e, xa que logo, é contrario ao intervencionismo do Estado. Mais depende da clase de intervencionismo. Se o intervencionismo é para favorecer as clases populares, é contrario. Mais se é para favorecer a clase social que defende (privatizar beneficios e socializar perdas) é un alumno avantaxado.
