Un ano máis, unha gran manifestación pediu onte en Bilbo que se respecten os dereitos dos presos políticos vascos e que se aplique unha nova política penal acorde aos tempos que corren. A de onte leva moitos anos sendo unha cita habitual. Ata o de agora, a principal reivindicación fora a de pór fin á vingativa e obstinada dispersión deses presos.
Vingativa, porque, aínda que non estea así estabelecido no Código penal e nas sentenzas, ten como obxectivo castigar dobremente os presos e as súas familias. Obstinada, porque, por moito que se fixeron peticións nos centos de manifestacións organizadas pola cidadanía e en varios informes redactados polas institucións públicas e por asociacións a favor dos dereitos humanos, os gobernos de Francia e de España fixeron oídos xordos, fosen dunha cor ou doutra.
Se para pór fin á dispersión fixo falta un gran traballo, necesitaranse doses máis grandes para conseguir pór en liberdade os presos
Hai uns anos, achegaron a maioría dos presos que estaban dispersos en Francia aos cárceres máis próximos a Ipar Euskal Herria: moito antes de que o Goberno de España empezase a mover a quen estaba ao seu cargo. En España, foi en 2021 cando o goberno de Pedro Sánchez empezou a trasladar os presos a Hego Euskal Herria ou a achegalos a prisións próximas. Hoxe en día son moi poucos os presos que aínda non están en cárceres de Euskal Herria, e espérase que os trasladen pronto.
É evidente que hai que entender ese cambio notorio de actitude no marco da relación que mantén EH Bildu co Goberno de España. Ata hai pouco, cando o PNV era case o único interlocutor, a resposta era sempre a mesma cando se lles preguntaba se á hora de negociar os orzamentos co goberno español incluirían entre as súas peticións acabar co afastamento de presos: "Pór fin á política de dispersión non está entre os temas da negociación dos orzamentos".
Agora que a dispersión está a piques de acabar, a rede cidadá Sare anunciou que dará inicio á campaña para pór en liberdade os presos antes de que termine a súa condena. Se para pór fin á dispersión fixo falta un gran traballo e unha paciencia infinita, necesitaranse doses aínda máis grandes para conseguir pór en liberdade de maneira gradual os presos que aínda non terminaron as súas condenas.
