A Coruña ten razóns dabondo para encarar con optimismo o ano 2022. Podemos mirar con luminosidade o que está por vir, porque durante os dous últimos anos, a pesar da pandemia, sentamos as bases para que así fose.
A pandemia trouxo consigo unha fonda crise sanitaria, pero tamén económica e a combinación de ambas as dúas provocou unha das experiencias máis traumáticas que, xeracionalmente, nos ten tocado vivir. Mais temos demostrado como sociedade que non nos van frear os atrancos, que ante a adversidade, medramos.
Porque todos e cada un de nós traballamos para facerlle fronte á crise e este ano, especialmente, para preparar a esta cidade para o día despois da fin da pandemia.
Todos actuamos nesa clave e con iso mudou o noso proxecto de investimentos para centrarnos nas persoas, con 20 millóns de euros dedicados aos plans de recuperación económica e social, aprobados ambos os dous por unanimidade da corporación. Ningún Concello ten chegado máis lonxe nas súas medidas de axuda e estímulo. Ningún. Non sei se se podería ter feito máis. Si sei que ninguén foi máis alá ca nós.
Temos argumentos para encarar con optimismo o ano vindeiro. Porque esta cidade ten en marcha unha fonda transformación que a fará máis forte, máis innovadora e máis amábel. Unha fonda transformación que avanza xa e que non ten marcha atrás.
A construción do enlace ferroviario ao porto exterior era non hai moito un soño, un soño que hoxe vai camiño de ser realidade. Tamén era impensábel viaxar a Madrid en tren en menos de catro horas. Ou pensar que por fin poderíamos ter saneada a nosa ría.
Conseguímolo, entre todos e todas, grazas ao diálogo institucional, sumando así un novo fito á Coruña que queremos para o que resta de século, unha cidade que pasa tamén polo grande reto dos terreos que ese tren axuda a liberar, os do noso porto interior.
Froito tamén do diálogo acadamos o compromiso dun novo Chuac ao que achegamos todas as facilidades e recursos dende a nosa aposta pola sanidade pública como grande alicerce da sociedade do benestar. Grazas ao diálogo tamén puxemos as bases para a construción do novo centro de saúde de Santa Lucía e da nova estación intermodal.
Fixémolo facendo da palabra un instrumento capaz de atopar os puntos de unión con partidos de distintas cores e con administracións de distintas sensibilidades. Os que entendemos que a política é a máis nobre das disciplinas non podemos actuar doutro xeito.
Hai razóns para ser optimistas. Pegados ao mar e tamén no aire. 2022 ten que ser o ano do despegue, como está a despegar Alvedro, sumando rutas que enlazan a nosa cidade con destinos nacionais como Gran Canaria, Valencia ou Málaga e internacionais, como Londres e París, favorecendo o turismo e tamén a actividade económica.
O ano do despegue de sectores estratéxicos como o das novas tecnoloxías, co impulso decisivo á creación da Cidade das TIC, auténtico polo de xeración de emprego e factoría de coñecemento, unha iniciativa que, da man da Universidade, consolidará A Coruña como a capital tecnolóxica de Galicia.
A transformación dixital e a sustentabilidade serán de seguro dúas pancas claves para avanzar na reactivación económica e na xeración de emprego, como o será tamén a capacidade que teñamos á hora de aproveitar os fondos de recuperación europeos Next Generation.
Fondos que debemos empregar para evolucionar cara a un modelo produtivo que teña máis en conta as persoas e que potencie o tecido industrial, así como a I+D+i e a economía do coñecemento. Un modelo que poña en valor o coidado do medio ambiente e a sustentabilidade como premisas irrenunciábeis.
2022 ten que ser o ano da recuperación, da recuperación económica e social, da apertura ao mar desta cidade, o ano no que as coruñesas e os coruñeses recuperen o acceso aos peiraos, o ano en que A Coruña volva ser un destino turístico de primeiro nivel en Europa, o ano no que a nosa cidade sexa de novo referente das grandes citas nacionais e internacionais da música e da cultura.
