Cada vez temos dispoñible máis tecnoloxía que nos permite recompilar todo tipo de datos sobre a nosa saúde. Calquera reloxo ou teléfono intelixente pode medir os pasos que damos durante o día, as horas de sono ou as pulsacións. A última incorporación a esta tendencia son os dispositivos que miden a glicosa en sangue. Consisten en pequenos parches que incorporan unha agulla subcutánea e que detectan constantemente os niveis desta substancia no organismo. Hai xa anos que están dispoñibles, pero nos últimos meses popularizáronse entre o público xeral.
Non cabe ningunha dúbida das avantaxes deste tipo de tecnoloxía para persoas que padecen diabetes, xa que se elimina a necesidade de pincharse varias veces ao día e ademais poden detectar moito máis rápida e eficazmente niveis perigosos de glicosa. O que parece menos claro son as avantaxes para persoas sen patoloxías. Ten algún sentido que individuos sans empreguen medidores deste tipo? Igual que acontece coa información biométrica que recolle o noso smartphone, os datos por si mesmos poden non indicar gran cousa. Saber, por exemplo, cantos pasos damos ao día pode axudarnos a ser conscientes da actividade física que realizamos e incrementala se é necesario. Pero coñecer en tempo real a nosa frecuencia cardíaca seguramente non teña moito sentido. Vai influír na nosa conduta ter 75 ou 80 pulsacións? Ao contrario, monitorizar estes parámetros en tempo real pode darnos a falsa sensación de seguridade ao coñecer datos que relacionamos erroneamente co noso estado de saúde xeral, pero ofrécenos moi pouca información útil. A algunhas persoas pode producirlles incluso certa ansiedade, se teñen a sensación de que unhas pulsacións elevadas poden ser perigosas, por exemplo. Coa medición da glicosa en persoas sas dáse o mesmo fenómeno: achega pouca información útil e pode facer que nos obsesionemos ou cambiemos a nosa relación coa comida para lograr unhas cifras "correctas". Podemos pensar equivocadamente que un pico puntual é perigoso ou nocivo para a saúde. Ademais, as recomendacións para calquera persoa non diabética van ser as mesmas sexan cales sexan as súas cifras: máis vexetais, menos produtos ultraprocesados, menos alcol e tabaco. Un número na pantalla do móbil non vai modificar a túa saúde global.
