Opinión

Caen as máscaras

Opinión

Caen as máscaras

Esta semana rematou a obrigatoriedade de levar máscara en interiores, exceptuando centros médicos e transporte público. Que deixe de ser obrigatoria non quere dicir que se prohiba, o cal pode parecer obvio pero non está de máis repetilo.

Non é a primeira vez na historia que se empregan máscaras para a vida cotiá, xa na gripe de 1918 foi unha medida empregada para frear os contaxios, coas limitacións en canto a materiais e acceso propias da época. Case todas eran máscaras artesanais, feitas con prendas de roupa, seguramente coidando pouco a hixiene, e non chegaron a converterse nunha medida universal. Xa non temos lembranza disto máis que polas imaxes, porque unha vez superada a pandemia, o seu uso diminuíu ata desaparecer.

Nesta ocasión pode que moitas persoas, ben por condicións de saúde ou ben por percepción de risco, decidan continuar a empregalas en certos momentos. Polo pronto, aínda hai lugares nos que o seu uso é obrigatorio. Porén, eu son da opinión de que, aínda que chegue o momento no que tampouco en centros médicos sexan obrigadas, se cadra si deberan converterse nun artigo de hixiene habitual. Por exemplo, se temos algún síntoma respiratorio e viaxamos en transporte público, se facemos unha visita a unha persoa hospitalizada ou a un bebé, aínda que deixe de ser obrigatorio penso que debera ser común e socialmente ben visto poñela.

O uso de máscaras tivo unha serie de consecuencias beneficiosas inesperadas, como unha incidencia moito menor da gripe e, sobre todo, do virus respiratorio sincitial e bronquiolites, ambas patoloxías potencialmente graves en lactantes e en persoas de idade avanzada ou inmunodeficientes. Aínda volvendo case por completo á antiga normalidade, podemos incorporar hábitos máis saudables aprendidos desta crise sanitaria. Cousas que viamos como normais, como visitas hospitalarias de varias persoas durante horas, bicos e arrechuchos varios aos bebés moi pequenos ou ir traballar con febre ou tose deberan formar parte do pasado e parecernos barbaridades. Acontece xa con cousas como fumar nos restaurantes ou circular sen cinto, que ata non hai moito eran o normal pero que hoxe non concibimos. Non creo que desta pandemia saiamos mellores nin peores, pero polo menos sería bo que saísemos cun par de cousas sabidas.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios