Opinión

A pandemia da saúde mental

[Alberte Mera]

Os efectos da Covid na sociedade son innegábeis, tamén na saúde mental. As mortes de seres queridos, os ingresos en UCI e hospitais, a distancia física, o confinamento, a soidade... Polo menos, a saúde mental comezou a cobrar protagonismo no debate social e político visualizando que esta outra pandemia que afecta por dentro non soporta o desmantelamento da sanidade pública.

De media, o tempo que pasa desde que Medicina de Familia deriva unha persoa á unidade de saúde mental do Sergas é de seis meses. Medio ano para recibir atención psicolóxica ou psiquiátrica. Cóntanme varias usuarias da unidade de saúde mental do Sergas que o peor non é a agarda pola primeira sesión de terapia, senón que unha vez dentro do sistema, a espera para a seguinte sesión adoita ser de catro meses. Aliás, a Galiza está á cola na media de psicólogos e psicólogas clínicas por 100.000 habitantes (18 en Europa, 6 no Estado e 3,5 na Galiza). E con isto, a Galiza aparece á cabeza do Estado en consumo de psicofármacos.

Moitas persoas están recorrendo á atención de especialistas da privada, que de media custan 60 euros por sesión de unha hora. Se a atención é de unha sesión por semana, son 240 euros mensuais. Un ben ao alcance de poucas persoas. Eis os froitos dos recortes sanitarios da Xunta.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios