[María Obelleiro]
Contra a Covid-19, máis Atención Primaria. É unha receita que ninguén nega, pois é esta a área principal para conter a pandemia. Mais como facelo coa cantidade de recortes que soportou nos últimos anos?
Antes de que abrollase o novo coronavirus, médicas e médicos chegaban a atender máis de 60 doentes cada día; a demora para conseguir cita co facultativo ou facultativa de cabeceira podía chegar a unha semana e o tempo de consulta cos pacientes era mínimo.
A sobrecarga dos servizos de urxencias dos hospitais debíase á sobrecarga da Atención Primaria. Faltaba xa entón persoal médico, de enfermaría, de fisioterapia, de psicoloxía, de traballo social, de administracións... E faltaban tamén medios materiais, pois a meirande parte dos centros de saúde contaban con ferramentas obsoletas ou nin sequera dispuñan delas. Non esquezamos tampouco a precariedade do persoal, con contratos de días e mesmo de horas.
Con este punto de partida, chegou o novo coronavirus á Atención Primaria. O Goberno de Feixoo fía o futuro do servizo á telemedicina, mais isto non vai de call center, vai de garantir a saúde do pobo.
