Viñamos de Marraquech o día 14 de outubro, en voo de Iberia. Sobre as 20 h. comezamos a baixar do avión na Terminal 4S de Madrid, desprazándonos a pé cara á Terminal 4. Pasamos dous controis de seguridade, o primeiro normal, pero o segundo resultou agresivo por parte dos traballadores que alí había, dúas mulleres e dous homes. Unha, que nos apuraba para desprendernos das cousas metálicas, acirrándonos arreo con berros e mesmo ademáns de empurres, collendo ás veces as nosas cousas para metelas na fita que leva ao escáner, e desprazándose de uns a outros inquieta e nerviosa. Eramos unhas corenta persoas, atemorizadas, baixo ese medo que impón o abuso e autoritarismo e que non deixa pensar, só seguir o camiño da imposición. Foron uns vinte minutos angustiosos, cos outros compañeiros dela, sobre todo un, dando ordes tamén en ton militar para que sacásemos os zapatos ou abrísemos a maleta.
A escena dos nazis abourando os xudeos veume axiña ao maxín, e aínda agora, cando penso no que ocorreu, se fixa con dureza esa imaxe. Porque inxectar o medo, a desorientación, os berros desmedidos, a incredulidade no que está pasando é o mellor xeito de someter ou rematar coa vítima. Non quero esaxerar o acontecido, pero foi grave o que fixeron eses homes e mulleres, sobre todo a que desprazaba na fita as nosas pertenzas persoais. Graves porque ningún cidadán ten que aturar a humillación en ningún caso, e máis cando é atendido por xente que representa a administración. Ponme medo pensar na cantidade de inxustizas, abusos e tratos vexatorios que neste momento se están producindo no Estado Español porque son síntoma, quizais, dun recruamento da represión organizada e mesmo potenciada desde distintos organismos. Esta xente que nos maltratou e acosou desa forma, son funcionarios? Son traballadores? Quen os manda? Quen lles dá ordes? Edúcanse na dialéctica democrática ou no abuso? Ou son traballadores e traballadoras contratados para que fagan o traballo do dobre da xente que sería necesaria? Por que non estaba aberta outra cabina de control para atender con normalidade a xente que alí nos amoreabamos? Por que non se respectou a legalidade que rexe estes actos?
Son funcionarios? Son traballadores? Quen os manda? Quen lles dá ordes? Edúcanse na dialéctica democrática ou no abuso?
![Publicidade 195691]()
Entre quen estabamos na sala de control habia tres persoas que por razóns físicas non podían seguir o ritmo das ordes autoritarias. Eu reaxín cando ollei as súas expresións de angustia e a súa parálise e daquela comecei a protestar. Uníronse algúns máis. Pero tiña medo de perder o control e pedinlle a quen me rodeaban que fixesen a denuncia correspondente. Fágoa eu pública e reclamo que se investigue esa actuación e que se pidan as responsabilidades deste abuso a quen corresponda. Nunca que se cale ou se ignore. Porque nisto está o freo a actitudes fascistas e mesmo nazis que se intentan introducir na nosa sociedade. AENA ten neste momento xa a miña denuncia.
