O sector pesqueiro segue sendo un dos piares fundamentais da economía galega. Hai poucos anos eramos unha potencia pesqueira e a nosa flota pescaba en moitos dos mares do mundo. A ampliación da zona económica exclusiva as 200 millas, a entrada na CEE, pero sobre todo a falta de políticas que teñan o seu interese na Galiza veñen provocando o desmantelamento sistemático da nosa flota. Exemplos a pares como a expulsión de Namibia, a guerra do fletán, a perda do banco canario-sahariano, a expulsión de Mauritania, ou a aplicación de cotas irrisorias nas nosas augas por parte do Estado español, condenan aos galegos a renunciar a unha actividade que dá riqueza e emprego por todo o noso litoral.
"Somos hexemónicos na comercialización de peixe conxelado e temos unha posición destacada na comercialización de peixe fresco, aínda que condicionados por moitas decisións que se adoptan lonxe de Galiza."
A pesares das distintas decisión políticas que levan condicionando a actividade e o número de barcos da nosa flota seguimos mantendo un sector comercializador importante. Somos hexemónicos na comercialización de peixe conxelado e temos unha posición destacada na comercialización de peixe fresco, aínda que condicionados por moitas decisións que se adoptan lonxe de Galiza.
O actual Goberno, obsesionado con garantir as liberdades dos operadores económicos, e nada lle preocupa outros dereitos e liberdades que magnifica a sacrosanta Constitución e que deberían ter como obxetivo as persoas e non os capitais, ven de trasladarlle ao sector un borrador dun Real Decreto para actualizar a lexislación relativa a primeira venda de produtos procedentes da pesca, o marisqueo ou a acuicultura.
Neste borrador xustifica, na variada casuística das modalidades de pesca, a oportunidade de aconsellar as excepcións ao paso obrigatorio das mercancías por lonxa, e así abre a posibilidade de que as Comunidades Autónomas poidan autorizar os “Mercas” como puntos de primeira venda.
"a oportunidade de aconsellar as excepcións ao paso obrigatorio das mercancías por lonxa, e así abre a posibilidade de que as Comunidades Autónomas poidan autorizar os “Mercas” como puntos de primeira venda".
Isto suporía por na picota o modelo comercializador galego, que basea a súa estrutura no paso obrigatorio por lonxa dos produtos procedentes da actividade pesqueira e marisqueira. Con esta normativa o peixe do Gran Sol, de Namibia, ou Arxentina xa non pasaría polas lonxas galegas, iría directamente a Plataforma Loxística de Zaragoza ou de Madrid para dende alí ser distribuído por toda a cadea no Estado.
Esta proposta ven condicionada pola grave situación que atravesan determinadas cadeas de distribución, como é Mercamadrid, e que ve na comercialización dos produtos do mar, un recurso para salvar a súa situación financeira. Esta proposta exemplifica perfectamente o modelo económico e social que defenden quen nos gobernan, onde se toman as decisións e en función de que intereses.
Unha vez máis, se non o remediamos, determinadas decisións políticas van favorecer determinados intereses e arruinarnos. Neste caso, a un dos nosos sectores económicos, a comercialización de produtos do mar. Non podemos pescar, non podemos construír barcos, non podemos ter caixas propias, non podemos comercializar,... Cal é o futuro que lle queda a Galiza?
