Vende Patrias: A que se está armando coa división de poderes. Entre o Montesquieu o Rousseau e toda esa tropa deixaron a civilización occidental sen principios.
Sobre Ruedas: Xa o tiñan claro os exipcios, a orde natural é piramidal, un arriba que mande e o resto obedecen.
Vende Patrias: Isto poñendo en orde a Meloni en Italia "Deus, Patria e familia".
Sobre Ruedas: Ou "Deus, Patria y Rei"...
Vende Patrias: Pero en Galiza, que Rei restauramos? Se se lle coñecese descendencia a Xelmírez poderíamos ter poder celestial e terreal...
Sobre Ruedas: Se polo menos tivese algún fillo putativo...
Vende Patrias: Nós o que precisamos é un xuíz soberano e punto. Como diría D. Manuel.
Sobre Ruedas: Si, pero un xuíz que pareza bondadoso, que vaia polas portas ofrecéndolle de todo. Como o Apalpador, pero en vez de burro ou mula que vaia en moto.
Vende Patrias: O Apalpador é un invento dos do Bloque.
Sobre Ruedas: Pois o Papá Noel.
Vende Patrias: O Papá Noel inventárono os que limpan as cociñas.
Sobre Ruedas: O importante, como di o outro, é o concepto. E o concepto é xuíz e monarca ou viceversa.
Vende Patrias: Xa está, demos coa pedra filosofal da división de poderes. Co fundamento para deixar constituída calquera constitución ou calquera tribunal constitucional: "Ou Monarquía Xudicial" ou "Xustiza Monárquica".
Sobre Ruedas: Tanto ten. Tanto monta, monta tanto.
Emilio López Pérez (Monforte de Lemos)
