Opinión

Coroavírus

Com licença da minha companheira de página, hoje vou atrever-me a escrever sobre saúde, e concretamente sobre umha doença que volta a espalhar-se rapidamente sobre o “republicanismo” espanhol: O coroavírus, umha cepa bastante forte da peste bourbónica.

Os sintomas desta doença som muito visíveis nas pessoas contagiadas, estas sofrem a perda da “tricolor” (espanhola) ficando reduzida a 14 de abril. Nos casos mais graves sentem o irremediável impulso de ovacionar durante três minutos e cinquenta segundos o monarca e mesmo sofrer delírios afirmando que se pode ser republicano e aplaudir Felipe VI “porque fai parte dos valores republicanos”.

O coroavírus é umha doença crónica e umha das sequelas mais graves é a visibilizaçom de que o republicanismo espanhol partilha idêntico paradigma com a direita mais cavernícola na defesa da unidade espanhola, apodrecendo quem se contagia.

O coroavírus deve ser erradicado por usurpador da soberania, por contraditório com os direitos da classe trabalhadora e por negador dos direitos dos povos.

 Só a vacina soberanista pode evitar a perpetuaçom da corrupta monarquia bourbónica e os privilégios do bloco oligárquico que este provoca. Só o soberanismo, que já há quatro décadas combateu a reforma política franquista, pode impulsionar umha verdadeira rutura democrática. Os consensos e os pactos de Transiçom já tenhem demonstrado que som tam eficazes quanto as Flores de Bach. Só umha forte campanha soberanista de vacinaçom porá em xeque o vírus da monarquia.

Comentarios