Teño amigas na política polas que poño a man no lume, mulleres dunha valía intelectual demostrada, dunha honradez a proba de bombas e cunha capacidade de traballo que eu nunca terei. Así que as palabras que seguen non son para elas.
E vou escribir un artigo moi incorrecto que igual non tiña que escribir. Pero non estou nisto para facer amigos nin para que me paguen as cañas. E a pesar de que eu debín de ser dos poucos articulistas que escribiu defendendo os políticos, a necesidade do seu oficio e a súa dignidade, o certo é que debo dicir que en xeral esa defensa custa un mundo, porque abonda moito entre eles a medianía intelectual, as poucas luces e a estreitez de horizontes mentais. E non están á altura do labor que teñen que asumir. E por iso non transmiten un pensamento nin lucido nin lúcido. E isto vale para todos os partidos. Tamén para os que eu lles voto. Sinto dicir isto. E asumo as consecuencias de dicilo. Que lle queren.
"A sociedade actual é mínima, minimalista, minimizada e que, xa que logo, vén sendo unha sociedade que xera políticos mínimos, minimalistas, minimizados, profesionais do xesto baleiro, da consigna pensada para que non signifique nada pero que sexa efectista".
![Publicidade 195634]()
Escoito falar da necesidade de atopar líderes (preferiría proxectos e programas) con carisma (preferiría con discurso). Iso é o que escoito. Mal síntoma. Porque se para gañar unhas eleccións se necesitan gabinetes de comunicación, expertos en mercadotecnia e argumentarios, se todo iso é necesario, daquela coido que queda demostrado que aqueles que teñen interese en gobernarnos non posúen cualidades de seu o suficientemente interesantes e poderosas como para seducirnos e que lles votemos. Por iso teñen que recurrir ao artificio das fotos trucadas e os bicos ás señoras no mercado.
Os gobernantes son un reflexo da sociedade. Hitler so podía aparecer nunha realidade fanatizada. E a sociedade actual é mínima, minimalista, minimizada e que, xa que logo, vén sendo unha sociedade que xera políticos mínimos, minimalistas, minimizados, profesionais do xesto baleiro, da consigna pensada para que non signifique nada pero que sexa efectista.
E eu, o que necesito, son políticos que me arrastren, que me ofrezan unha cosmovisión o suficientemente ampla e intelixente como para que se diferencien do resto. Estou cansiño de profesionais da política que só saben deterse na casuística. E nin sequera na que importa, senón na que electoralmente poida ser máis rendible.
Eu quero votar e sentirme orgulloso de a quen voto.
E a día de hoxe, cústame un mundo.
