O día 1 de setembro a AELG xunto co Colectivo ArTeu organizan na Coruña a xornada Homenaxe Nacional ao poeta Bernardino Graña, "Medre o Mar!" na que se inclúe unha travesía polo mar da Coruña. O poeta X. H. Rivadulla Corcón contribúe con este poema á homenaxe.
Oda ao poeta de Cangas Bernardino Graña
Polo escuro do mar que vos contruba
aínda hai poemas de luz nos seus abrigos,
poeta de Cangas, meu amigo,
meu irmán de salitre e sol e chuva.
Polo vento que trae o mar de Cangas a Cabo Home
aínda resoa a túa voz en claro poema, Bernardino,
e escoito nas tabernas todas da túa vila aos gatos mariñeiros
recitando os teus versos de salitre, amor e loita.
Aprecio a túa man firme de poeta cando apertas a miña
e sinto nela a túa loita pola vida, pola xustiza e a esperanza,
e quero ser máis que o teu amigo, Bernardino,
quero ser grumete no teu navío navegando á liberdade.
Que cando ti vas aos remos xa non hai medo
ás vagas de mar nin ás galernas,
poeta de Cangas meu amigo, que miras limpo
como o vento que entra polas Cíes.