Sermos Galiza non poderá acollerse ás axudas destinadas aos medios de comunicación que se expresaren en galego. E iso porque o goberno da Xunta decidiu que non puidesen beneficiarse de tal apoio os medios que nacesen durante o presente ano. En épocas de recorte, a Xunta ten medo de desbaldir recursos nos proxectos que van xurdindo para crear un espazo galego de comunicación mais non o ten de financiar aqueles medios afíns que se expresan integramente en español. Esta medida retrata, no eido informativo, o acontecido desde que o PP tomou o poder. Todas as iniciativas para normalizarmos a nosa lingua foron cortadas de raíz. Resulta ben curioso que no ano 2013, cando o día das letras galegas se dedica a Roberto Vidal Bolaño e, daquela ao teatro −o xénero por excelencia da intervención social−, os equipos de normalización lingüística tamén sufran recortes. A intervención existe, aínda que contraria aos intereses normalizadores e vai causar precisamente que enmudeza a actividade teatral "popular", a realizada por grupos afeccionados en asociacións culturais, ou polo alumnado dos centros de ensino. Finalmente mesmo as propias asociacións culturais están ameazadas e os centros de ensino contarán con menos persoal que nunca.
A anécdota do que acontece cos medios de comunicación é só un botón de mostra desa dinámica do medo que se está a instalar na sociedade porque esta semana, no Congreso, o actual presidente do Estado español anunciaba medidas propias dun estado de excepción sen que a voz se lle quebrase. Nas redes sociais difundíase a imaxe da ministra italiana ao anunciar os recortes −tensa, contraída e chorando−, mentres Soraya Sáenz de Santamaría aparecía como unha auténtica estrela do celuloide coa cabeza repousando na man, relaxada e feliz. Esa performance dos gobernantes que padecemos −a pose tesa como un buxo− resulta ben indicativa da súa inflexibilidade e insensibilidade.
Suprímese unha paga ao funcionariado? Será para ouvirte mellor. Que se sobe o IVE até o 21%? Será para verte mellor. Que se baixa a prestación por desemprego ao 50% a partir do sexto mes? Será para incentivar a procura activa de emprego. Esas decisións funestas, destinadas a aforrar 65.000 millóns de euros en dous anos quizais poderían ter algún tipo de xustificación nun contexto de guerra, por exemplo. Mais son unha inmoralidade nun estado que presta axuda á banca e permite impunemente a evasión fiscal das grandes rendas. Porén ao presidente do goberno non lle treme un músculo. Desde os seus escanos as señorías do PP aplauden e só lles falta berrar "to-re-ro". Con ese chulerío de quen vai matar un animal, así se chanta o presidente. O caso sería simplemente patético se non tivese consecuencias nas nosas vidas. Se non as cambiase a peor. As imaxes da manifestación en defensa dos mineiros asturianos dan conta, no entanto, dunha revolta que se vai xestando, que amasa indignación e que un día debe estouparlle na cara ao lobo feroz.
Opinión
Avoíña, que orellas tan grandes tes!
Sermos Galiza non poderá acollerse ás axudas destinadas aos medios de comunicación que se expresaren en galego. E iso porque o goberno da Xunta decidiu que non puidesen beneficiarse de tal apoio os medios que nacesen durante o presente ano.