Alegría de ver como as loitas sirven para algo, que os veciños de Santa Cruz de Parga e a súa Comunidade de Montes, apoiados por partidos, sindicatos, entidades e veciños de todo Guitiriz teñan gañado ao exército coa forza da razón. A retirada das concertinas permite a veces acreditar en que a xustiza non se mendiga, exércese diante de quen sexa por moito poder que teña.
"Cecais o seguinte debate debera ser a devolución dos terreos do campamento a quen lle foron usurpados nos tempos da ditadura"
Sorprendente tamén que un anuncio do estado o exerza un membro dun partido da oposición de Guitiriz que non se implicou nesta demanda cando estaba na alcaldía. Onde está o respeto institucional dun goberno que anuncia accións a través dun partido? O respeto, igual que a xustiza, hai que gañalo, pero en calquer caso, parabéns á xente de Santa Cruz. Cecais o seguinte debate debera ser a devolución dos terreos do campamento a quen lle foron usurpados nos tempos da ditadura, pero esa é outra historia...
