Abrirase a xornada coa presentación do libro Coeducación. O alicerce do ensino, editado por CIG-Ensino e a ASPG, no que diferentes autores e autoras reflexionan sobre a educación en materia de igualdade, con exemplos prácticos levados a cabo en centros galegos.
Pola mañá, participarán no encontro a profesora Carme Adán, quen presentará o seu libro Feminicidio e conversará sobre dito concepto; a crítica literaria Montse Pena, quen traballará as pautas para analizar a literatura infantil e xuvenil desde unha óptica feminista e a escritora Inma López Silva; quen após presentar o seu Chámame señora pero trátame coma un señor falará do machismo na literatura.
Pola tarde será a quenda da xornalista e graduada en Educación Primaria María Obelleiro, quen analizará o machismo nos libros de texto, e das docentes María Carmen Rivas Corbacho e Raquel Martínez Rivas, do IES Ricardo Mella, e Mirian Morán, do CPI Viaño Pequeño, que contarán a súa experiencia en coeducación nos seus centros. Para rematar, proxectarase o documental Tecido resistente. A revolución silenciosa das mulleres de Présaras, da xornalista Marina Chiavegatto.
A matrícula estará aberta até a quinta feira 21 de febreiro na seguinte ligazón.
