A Xunta vén de intervir a residencia de maiores Paz y Bien de Tui co fin de reforzar o persoal do centro. Unha vez avaliada a situación da residencia, as Consellerías de Sanidade e Política Social acordaron tomar esa medida co obxectivo de garantir a correcta protección da saúde, tanto das persoas usuarias como das traballadoras e traballadores do centro.
Un equipo da Consellería de Política Social está xa desprazado no centro para facer un seguimento permanente sobre a situación dos residentes, así como para vixiar a correcta aplicación das medidas de prevención, seguridade e hixiene. Os profesionais do Sergas tamén velarán pola continuidade dunha atención sanitaria axeitada na residencia.
A residencia de maiores Paz y Bien de Tui rexistra 66 casos positivos entre os usuarios e 16 entre os traballadores.
A situación nas residencias de maiores continúa a empeorar na Galiza nestes días. Segunda dados da propia Xunta esta terza feira, nas últimas horas rexistráronse 90 novos positivos, a metade deles (44) na residencia de Ribeira e todos referidos a persoas usuarias.