Imprimir

A vontade de termos futuro

Xoán Costa | Presidente do Consello de Administración de Sermos Galiza S.A.

Xoán Costa | 26 de outubro de 2013

A imaxe dunha crianza que dá os primeiros pasos, primeiros mais decididos,

 

A imaxe dunha crianza que dá os primeiros pasos, primeiros mais decididos, proxectando a sombra do seu corpo nun fondo verde en que salienta un mapa da Galiza, e o lema "Por unha Galiza con futuro", preside a mesa do VI Congreso da CIG-ensino.

Un congreso realizado só dous días despois de que máis de 65.000 persoas convocadas pola Plataforma galega en defensa do ensino público reclamamos na rúa, baixo a chuva, a retirada da Lomce. Daí que este asunto, a Lomce, tivese unha ampla presenza quer no informe de xestión da Executiva quer nos documentos a debate no propio Congreso.

Os datos dunha afiliación en crecemento e nunha franxa etaria maioritariamente situada por baixo dos 50 anos son garantía desa Galiza con futuro que serve de lema ao Congreso.

A contextualización da actual reforma educativa no marco das políticas económicas neoliberais, baseadas no predominio do capital financeiro sobre a economía produtiva e sobre as necesidades das maiorías sociais; a mercantilización e a privatización da educación, utilizando a crise como desculpa, non teñen outro obxectivo que privar de formación unha parte considerábel da poboación para así afianzar os mecanismos de explotación e de dominación, de propagación dos valores clasistas, relixiosos, competitivos e sexistas.

A análise rigorosa e clara deste contexto e dos propósitos en que se fundamenta a Lomce nos documentos congresuais e no informe de xestión xustifican por si sós o éxito da convocatoria de folga e axudan a explicar e comprender a implantación social do sindicato maioritario no ensino nos derradeiros 30 anos, desde que hai eleccións sindicais no ensino. Os datos dunha afiliación en crecemento sostido e nunha franxa etaria maioritariamente situada por baixo dos 50 anos, é garantía desa Galiza con futuro que serve de lema ao Congreso.

A crianza que camiña cara ao futuro, nunha Galiza en sombra, simboliza ben as prioridades do sindicato para os próximos anos. Verémolo no VII Congreso.

Podes ver este artigo na próxima dirección /opinion/xoan-costa/vontade-termos-futuro/20131026205616020515.html


© 2020 Nós Diario