Viaxando cos sentidos

Baozis de zamburiña Imos darlle un toque galego a estes boliños de orixe chinés cun recheo de zamburiñas, ceboliña e cabaciña. Ingredientes (18 unidades): 200 g de fariña de trigo 125 g de auga 18 zamburiñas 1 ceboliña 1 cabaciña salsa de soia Para o recheo Picamos en anacos pequenos a cabaciña e botámoslle un chisco de sal para que solte a auga. Agardamos 15 minutos e escorrémola premendo coas mans. Picamos tamén en anacos pequenos a cebola e as zamburiñas e mesturámolo coa cabaciña escorrida. Endímoslle duas culleradas de salsa de soia e remexemos todo. Para a masa Mesturamos a fariña cunha cullerada de sobremesa de sal e coa auga quente, amasamos un pouco e deixamos repousar 20 minutos. Voltamos amasar outro pouco e deixamos repousar unha hora. Pasado este tempo facemos un burato no medio da masa e imos estirándoa até ter un colar do mesmo grosor. Partimos en 18 anacos iguais a masa, e cun rolete e un pouco de fariña estiramos moi ben os anacos até que quede ben fina. Colocamos sobre a masa estirada unha cullerada de recheo e pregamos os bordos facendo saquiños. Cociñamos ao vapor durante 15 minutos, se non temos unha vaporeira podemos colocalos nun coador sobre unha pota con auga fervendo. Comémolos acompañados de salsa de soia para mollar. Bacalhau à margarida da praça Este é un xeito de preparar o bacallau moi popular no norte de Portugal, faise ao forno con cachelos e cebola. Ingredientes (2 persoas): 2 lombos de bacallau 3 cebolas grandes 2 allos 4 patacas pementa moída Elaboración: Lavamos e cocemos as patacas coa monda e un pouco de sal durante 25 minutos. Agardamos que arrefríen un pouco, mondámolas e cortámolas en toros. Nunha tixola con aceite quente pasamos o bacallau un minuto por cada lado e reservamos. Engadimos ao aceite os allos pelados e as cebolas cortadas á xuliana, Sobre unha bandexa apta para o forno, facemos unha cama cos cachelos, colocamos enriba os lombos de bacallau, cubrimos coa cebola e botámoslle pementa moída por enriba. Metémolo no forno, que previamente quentamos a 180 graos, durante 10 minutos, até que se doure a cebola. Torta crocante de mazá Esta torta é unha versión do crumble de maza, unha sobremesa moi famosa en Inglaterra. Ingredientes ( 4 persoas): 1 lámina de masa crebada (masa brisée) 1 kg mazás 130 g de azucre 130 g de manteiga 160 g de fariña de trigo 1 limón canela Elaboración: Estendemos a masa nun molde redondo para forno, pelamos e cortamos as mazás en anacos iguais e botámolos sobre a masa. Botámoslle o zume do limón por riba, 30 g de azucre, 50 g de manteiga en dadiños, un chisco de canela e mesturamos todo. Quentamos o forno a 180 graos e cocemos durante 15 minutos. Mentras mesturamos 100 g de azucre con 160 g de fariña e 80 g de manteiga, amasamos coas mans de xeito que se vaian formando faragullas pequenas. Pasados os 15 minutos botamos as faragullas de masa por enriba das mazás e metemos no forno a 200 graos durante 20 minutos, até que a capa de enriba se doure.