A UE e China reafirman o compromiso económico coa OMS

Os Estados Unidos advirten que poderían non restabelecer o financiamento á organización da ONU e mesmo traballar na creación dunha entidade alternativa.

mike_pompeo
photo_camera Pompeo dixo que a Casa Branca estuda crear unha organización alternativa á OMS (Polaris)

A UE reiterou nesta sexta feira, 24 de abril, o seu apoio ás institucións multilaterais, insistindo en que son os mellores instrumentos de coordinación para enfrontar a crise do coronavirus, e reafirmou que axudará economicamente a Organización Mundial da Saúde (OMS).

Nunhas declaracións con motivo do día internacional de Multilateralismo e a Diplomacia de Paz, o Alto Representante da UE para Política Exterior, Josep Borrell, expresou o compromiso do bloque europeo coas institucións internacionais, en particular coa ONU. Neste contexto enviou unha mensaxe de apoio ao labor da OMS e comprometeuse co seu financiamento.

A suma da contribución das UE e dos Estados membros converte ao bloque non principal contribuínde da OMS, con máis de 146 millóns de dólares (135 millóns de euros) achegados en 2019. Ademais, comprometeu outros 114 millóns para o plan estratéxico de Preparación e Resposta liderado pola OMS para axudar os sistemas sanitarios máis vulnerables.

Tamén o Goberno da China anunciou nesta quinta feira a doazón de 30 millóns de dólares (máis de 27 millóns de euros) á OMS, en aras da "solidariedade". Anunciouno a portavoz do Ministerio de Exteriores chinés, Hua Chunying, na súa conta de Twitter, desde a que lembrou que o xigante asiático "xa doou 20 millóns de dólares en efectivo á OMS no 11 de marzo".

Creación de organismo paralelo

O compromiso europeo e chinés chega despois do anuncio do presidente dos Estados Unidos, Donald Trump, de suspender o financiamento á axencia internacional.

Neste sentido, o secretario de Estado estadounidense, Mike Pompeo, afirmou na quinta feira que a pandemia da COVID-19 mostra a necesidade de reformar a OMS, e advertiu que Washington podería non restabelecer nunca o financiamento á organización da ONU e mesmo traballar na creación dunha entidade alternativa.

Comentarios