Un grupo de traballadores do sector de ambulancias fechouse na mañá desta quinta feira no despacho do conselleiro de Sanidade en demanda dunha solución ao conflito do sector e exixindo a implicación da administración como responsábel última do servizo. Os operarios, una ducia, e os representantes da CIG Xabier Aboi e Nacho Pavón foron identificados pola Seguridade.
No marco desa acción tivo lugar una xuntanza co xerente do Sergas e o secretario xeral da Consellería. “Lembrámoslles que a Xunta ten que implicarse no conflito pois é a responsábel última do servizo e a situación actual deriva das ofertas á baixa no último concurso público”, explica Inacio Pavón en conversa con Sermos Galiza.
Os representantes de Sergas e Sanidade “ficaron en que ían instar as empresas a que se abrise a mesa de negociación” e tamén que informarían os representantes do persoal sobre se a Xunta decida intervir ou non no conflito. O sexto día da greve intermitente no sector de ambulancias volveu ter un seguimento destacábel, asegura Pavón, que destaca que en cidades como Vigo, Compostela, Pontevedra ou A Coruña está en 100%.
O persoal de ambulancias protagoniza esta cuarta e quinta feira xornadas de greve na loita por un convenio digno. Até 12% de rebaixa no prezo. Esa é a oferta á baixa que apresentaran as empresas no último concurso público de ambulancias convocado pola Xunta de Galiza. Cun acordo insuficiente para facer fronte ao servizo —no caso de Santiago, 80% do prezo marcha nos salarios en detrimento de obrigas como hixienizar os vehículos ou limpeza da roupa de traballo—, a patronal tenta ser rendíbel a custe de paralizar a negociación do convenio colectivo, onde solicitan até 25% de recorte salarial.