Imprimir

Os efectos da terceira onda sitúan Galiza en alerta máxima

Yuri Carrazoni | 14 de xaneiro de 2021

Mapa que reflicte as diferentes restricións aplicadas a cada concello (Infografía: Nós Diario).
Mapa que reflicte as diferentes restricións aplicadas a cada concello (Infografía: Nós Diario).
A Xunta recúa e endurece as restricións en todo o país. 60 concellos pasan ao nivel 'extremo' de alerta e os restantes entran no 'medio-alto'. As medidas ficarán vixentes até mediados de febreiro.

A pasada sexta feira, Sanidade anunciaba un lixeiro aumento das restricións, especialmente nos concellos da Coruña, Compostela e Ourense, e como norma xeral instaba a poboación galega a "autoconfinarse" e saír do domicilio "só para o esencial". Con todo, o conselleiro, Julio García Comesaña, advertía da posibilidade de endurecer as medidas en todo o país se a evolución da Covid seguía a ser negativa.

Ese momento chegou esta terza feira na reunión que mantivo o comité clínico e detallouse onte na rolda de prensa que ofreceu o presidente da Xunta da Galiza, Alberto Núñez Feixoo, para anunciar as novas limitacións.

O mandatario galego comezou a súa intervención sinalando que os datos "confirman" as predicións: a terceira onda da pandemia xa está aquí. Malia que a presión hospitalaria é menor que a que padeceu Galiza nos momentos máis críticos de abril e novembro, a tendencia actual é "peor" que a daquela segunda onda: "Se non aumentásemos as restricións, as proxeccións apuntarían a un novo pico a finais de febreiro, e a ocupación hospitalaria podería acadar os niveis de abril", explicou.

"A tendencia actual é peor que a de novembro durante a segunda onda", di Feixoo

A taxa de incidencia acumulada a 14 días disparouse nos últimos días até 325 por cada 100.000 habitantes, e a 7 días acada 207. Ambos indicadores duplicáronse no último mes. "Estamos nun momento especialmente preocupante, e isto obríganos a afrontar a situación coa máxima responsabilidade e co mesmo realismo que en marzo", apuntou Núñez Feixoo.

Estes datos provocaron que o Ministerio de Sanidade incluíse Galiza no listado de territorios en situación de 'risco extremo'. A incidencia galega é a undécima máis elevada do Estado español a 14 días vista, aínda que por baixo da media (454). É por iso que na madrugada da quinta á sexta feira entrará en vigor un novo paquete de medidas que, segundo as predicións da Xunta, podería ficar vixente até mediados de febreiro.

60 concellos do país (que representan 47% da poboación galega) pasan ao nivel 'extremo' de alerta sanitaria, e os restantes entran na categoría de 'medio-alto'. Así mesmo, o toque de recoller adiántase en toda Galiza unha hora, ás 22.00h.

Feche individual de concellos

A partir desta sexta feira, suprimiranse as 'améndoas' formadas por agrupacións de concellos limítrofes (como o que mantiveron até hoxe Compostela, Ames e Teo), polo que o feche perimetral será "individual". Deste modo, non se poderá entrar nin saír de ningún municipio co nivel máximo de alerta agás por causas xustificadas (asistencia ao posto de traballo, coidado de persoas maiores ou cativas, atención sanitaria ou compra de bens indispensábeis). Esta é unha recomendación que Núñez Feixoo fai a toda a poboación tamén dentro do propio municipio: "Debemos saír só para o esencial", insistiu. As visitas hospitalarias, así mesmo, quedan restrinxidas en toda Galiza a unha persoa por doente, "salvo casos excepcionais".

A restrición da mobilidade intermunicipal afecta aos 60 concellos en nivel 'extremo' e a Vigo, Pontevedra e Lugo, que, malia ficaren no nivel 'medio-alto' porque os seus datos non son tan negativos, preocupa a crecente evolución do virus, en especial nos dous primeiros municipios.

Prohíbese a mobilidade entre concellos que estean en alerta máxima agás causas xustificadas

"Mantivemos unha reunión cos alcaldes e pediron ficar na alerta 'medio-alta'. Os datos hoxe permíteno, mais nos vindeiros días poderiamos vernos na obriga de restrinxir ao máximo a hostalaría tamén nestes lugares", advertiu o presidente, que salientou que Lugo é hoxe "a mellor cidade da Galiza" no tocante á contención da Covid, e "non tería risco" de subir o nivel das restricións nas vindeiras datas.

En total, 64% da cidadanía galega non poderá saír do seu municipio sen xustificación. Por outra banda, os restantes concellos que manteñen o nivel 'medio-alto' non teñen limitacións de mobilidade, polo que a súa poboación pode desprazarse libremente a outros concellos que estean no mesmo nivel aínda que non teña unha causa xustificada. Con todo, a Xunta pide "responsabilidade" para evitar calquera desprazamento que non sexa imprescindíbel.

Novas limitacións na hostalaría e o comercio

Os locais de hostalaría e restauración deberán fechar antes das 18 horas en todo o país, independentemente da alerta que rexa cada municipio. Os centros comerciais tamén seguirán abrindo as súas portas, coa condición de que as visitantes só poderán utilizar os corredores e espazos comúns como zonas de tránsito, quedando prohibido deterse a comer ou conversar con outras persoas. Así mesmo, deberán fechar ás 21.30 horas, e serán vixiados "con especial atención".

Nos concellos co nivel máximo de restricións, a hostalaría só poderá atender clientes nas terrazas, cun aforo reducido a 50%, tal e como acontecía até o de agora. Porén, poderase entregar comida a domicilio sen límite horario, e permitirase a recollida en tenda até as 21.30 horas. Nestas localidades, o aforo das tendas limítase a 30%, tamén nos centros comerciais, mais os estabelecementos de xogo deberán permanecer fechados.

No tocante aos concellos en alerta 'medio-alta', o aforo da hostalaría tamén será da metade nas terrazas, e de 30% no interior dos locais. No comercio, será de 50%. Os horarios de feche son os mesmos para todos os concellos do país. "Somos plenamente conscientes dos esforzos que pedimos, as restricións son complexas e sabemos que a fatiga pandémica logo de tantos meses aféctanos a todos, e hai sectores especialmente castigados como a hostalaría ou o comercio", expuxo o presidente da Xunta.

Cultura e lecer

As actividades de deporte non federado limítanse a catro persoas, e unha capacidade de 50% no caso de desenvolverse nun espazo interior. Así mesmo, os centros recreativos turísticos tamén poderán recibir visitantes, mais tamén 50%, e en grupos de máximo catro persoas. Pola súa banda, os cinemas, teatros e auditorios poderán abrir cun aforo máximo de 250 persoas no interior e 500 se é un espazo ao aire libre.

Alén disto, en resposta a unha pregunta sobre a viabilidade dos exames presenciais de xaneiro nas tres universidades galegas, Núñez Feixoo amosou a súa confianza na "seguridade" dos centros para manter o calendario actual: "No suposto de que non houbese unhas medidas claras, poderiamos estudar alternativas á presencialidade, mais polos datos que comunican os reitores estou seguro de que, coas quendas precisas e regulando os accesos ás facultades, podemos facer exames presenciais para garantir o mesmo principio de mérito de todo o alumnado", argumentou.

Reunións entre non conviventes

No tocante á interacción social entre persoas de diferentes unidades familiares, a norma é a mesma en todo o país: permítense as reunións de non conviventes até as 18 horas, tanto nos domicilios coma nos espazos públicos que teñan autorización para abrir. Nestes encontros poderá haber un máximo de catro persoas.

"Desde as 18 horas non está permitida a actividade da hostalaría, polo que tampouco se debe a partir dese momento manter reunións de non conviventes en espazos privados", explicou Núñez Feixoo, que aproveitou para instar a cidadanía a non facer a "trampa" de "trasladar o bar ao domicilio".

Con todo, que se permitan as reunións entre non conviventes durante o día non quere dicir que sexa o máis recomendábel: "Lamentabelmente non temos capacidade para controlalo, pero insistimos na recomendación de manter contacto unicamente cos membros da unidade familiar coa que se vive, e se cumprimos isto estaremos a facer un grande esforzo para conter o aumento dos contaxios", matizou.

A oposición pide Feixoo que "asuma a responsabilidade"

Após a rolda de prensa do presidente galego, os partidos da oposición criticaron Núñez Feixoo por "responsabilizar" a poboación do agravamento da crise sanitaria: "A situación non é culpa dunha cidadanía que maioritariamente está cumprindo coas normas, e por iso o intento de Feixoo de responsabilizala é indigno, máxime vindo de alguén que se fixou como obxectivo salvar o Nadal", afirmou Ana Pontón, portavoz nacional do BNG.

A dirixente nacionalista pediu Feixoo que "deixe de berrar á xente e asuma as súas responsabilidades", e opinou que "a preocupación das galegas no medio da pandemia non é trasladar os bares aos seus domicilios".

Na mesma liña apuntou o secretario xeral do PSdeG, Gonzalo Caballero, quen apuntou á "inconsistencia" amosada polo presidente ao non facerse "co responsábel" da situación: "En momentos coma o verán, no que o nivel de contaxios se controlou, non houbo un día no que non tentase atribuírse o éxito", lamentou, e engadiu que "a poboación galega estase a comportar de forma prudente e responsábel".

As dúas formacións esixiron "axudas directas" para "rescatar" os sectores máis afectados pola pandemia sen deixar de lado as medidas "precisas" para combater o avance da Covid.

Podes ver este artigo na próxima dirección /articulo/social/terceira-onda-situa-galiza-alerta-maxima/20210113201140113694.html


© 2021 Nós Diario