Uns 33.000 traballadoras e traballadores da sanidade pública estaban chamados á folga que se iniciou ás 10 da noite do domingo e se prolongará durante 48 horas. A folga mostra a oposición do persoal do sector ao proceso de privatización dos servizos, ás Areas de Xestión Clínica ou os repagamentos farmaceuticos.
Terza feira toda a cidadanía está chamada ás mobilizacións en defensa da sanidade pública, en apoio tamén á folga que o persoal da sanidade pública mantén durante dous días. O cadro de reivinciacións céntrase no rexeitamento ás privatizacións e na defensa dunha sanidade pública, universal e de calidade.
O persoal do SERGAS denuncia a deficiencias na atención aos pacientes que se están a producir pola aplicación da taxa de reposición do 10%, os recortes laborais e salariais e, de maneira especial, a utilización de traballadores e traballadoras para aplicar recortes a través das Áreas de Xestión Clínica.
Mobilizacións cidadáns
Apoiada por SÓS-Sanidade Pública, os sindicatos convocantes da folga chaman tamén a mobilizacións en cidades e vilas que se desenvolverán a terza feira día 10 en defensa da sanidade pública e en contra dos recortes e a privatización.
Denuncian o acelerado proceso de privatización que o PP está a desenvolver, tanto desde a Xunta como desde o goberno central e que se materializa, poñen por caso, no repagamento de medicamentos de dispensación hospitalaria ou no material ortoprotésico, o que está a afondar nas desigualdades social e a que a saúde sexa para quen pode pagala.
A greve convocada polos sindicatos CIG, CCOO e CESM-O´Mega conta cunha táboa reivindicativa que, na maioría dos seus pontos, céntrase no dereito da cidadanía á sanidade pública, diante dun deterioro dos servizos por mor de privatización e recortes. Canto ás reclamacións laborais, o persoal sanitario denuncia os continuos recortes, polos que se lle suprimiu o complemento específico das pagas extras e outras perdas de dereitos laborais como días de libranza ou incremento da xornada.
Desde a Plataforma en defensa da Sanidade Pública alertan de que "se non reaximos de xeito urxente, ben cedo o desmantelamento e privatización da sanidade pública será irreversíbel, xa que a Xunta transformará os centros sanitarios en empresas privadas, recortando o persoal, e obrigándonos a pagar pola asistencia sanitaria".
Mobilizacións para a terza feira 10 de decembro.
O Barco: 20:00 h con saída do Hospital comarcal. Conde de Fenosa
Ourense: Ás 20:00 h, con saída do Pavillón dos Remedios
Burela: Ás 20:30 h, con saída do Hospital da Costa
Vigo: Ás 20:00 h con saída do Hospital Xeral
Ferrol: Ás 18:00 h, con saída da Praza de España.
Lugo: Ás 20:00 h, con saída do edificio multiusos da Xunta de Galiza
Pontevedra: Ás 20:00 h, con saída da porta principal do Hospital provincial
Santiago: Ás 20:00 h, con saída da Praza Roxa
A Coruña: Ás 20:00 h, con saída da Casa do Mar
Barbanza: Ás 20:00 h con saída do centro de Saúde
Monforte: Concentración na Praza de España, ás 20:00 h
Salnés: Concentración ás 14:00 h diante da porta principal do Hospital
Cee: Concentración ás 12:00 h diante da porta principal do Hospital.