San Sadurniño vira este domingo, 28 de abril, en escaparate da produción floral e da planta ornamental da comarca nunha nova edición da Feira da Plantación, que tamén reunirá artesanía e outros motivos relacionados cos viveiros.
A XXIV feira contará con planta de temporada para decorar xardíns e balcóns e tamén con árbores froiteiras e plantas da horta, así como sementes, ferramentas e maquinaria. Mais isto non será todo. O Concello programou toda unha serie de actividades paralelas e animación que fan da feira un motivo ideal para pasar o domingo en San Sadurniño.
Os expositores abrirán o domingo ás 10 horas e de 11.30 a 13.30 horas o Mago Antón presentará ante as persoas asistentes o seu último espectáculo, con moitas sorpresas, humor e maxia. De 12 horas a 13 horas desenvolverase o obradoiro infantil de elaboración de queixo e ás 14.15 horas será o primeiro sorteo de lotes de produtos do país.
De 16.30 horas a 18.30 horas decorrerá a segunda quenda das actuacións do mago e ás 17 horas as crianzas poderán desfrutar dun obradoiro infantil de elaboración de queixo. Media hora após haberá a oportunidade de gozar da exhibición da asociación Brío e ás 19.15 horas sortearanse máis lotes de produtos do país. Mais ir o domingo a San Sadurniño equivale a recibir un premio, pois as persoas asistentes levarán como agasallo para a casa unha planta que se entregará nunha bolsa de papel reciclado.