Imprimir

Rosalía baixa de novo ás rúas

Redacción | 24 de setembro de 2018

Presentación do Festival Rosalía en Compostela. Foto: cedida.
Presentación do Festival Rosalía en Compostela. Foto: cedida.

Este sábado Rosalía de Castro volverá pasear polas rúas de Compostela. Farao da man da segunda edición do Festival Rosalía que, organizado pola Deputación e mais o Concello, encherá o 29 de setembro de concertos, danza, libros e obradoiros.
 

Unha cultura con superpoderes e unha imaxe da poeta convertida en superheroína presiden a xornada, que se estenderá das once da mañá ás nove da noite. A Praza de Cervantes, no casco vello compostelán, será o epicentro.

festival rosalía

 

A primeira hora inaugurarase a feira de produtos “con marca Rosalía”. Del farán parte trece postos que “fomentan o comercio local e de proximidade”. Ao pouco, Os Quinquilláns exporán o seu Pasarrúas Rosaliano. Ao tempo, o público poderá asistir en directo á creación dun “grafite rosaliano”.

 

A sección musical da festa correrá a cargo de Son Trío, tres mulleres (Su Garrido Pombo, Katerina Linke e Susanna Blanco) que reinterpretan textos de Follas Novas con aires jazz, e mais o folk de Val das Mouras. Será a partir das oito do serán. Unha horas antes, á unha do mediodía, Uxía ofrecerá o seu Rosalía Pequeniña, dirixido ás crianzas.

 

Mónica de Nut e Ánxela Blanco amosarán o seu espectáculo de “danza performance” en dous pases, ás 12.30 e ás 17.00 horas. Ás 17.30, a Vella Escola fará un obradoiro de rap a partir dos textos da poeta.

 

A vicepresidenta da Deputación Goretti Sanmartín e mais a concelleira de Igualdade de Compostela Marta Lois presentaron esta segunda feira as actividades do segundo Festival Rosaía.

Podes ver este artigo na próxima dirección /articulo/cultura/rosalia-baixa-novo-ruas/20180924134834072293.html


© 2020 Nós Diario